मनसे अध्यक्ष राज ठाकरे सध्या विदर्भ दौऱ्यावर आहेत. या दौऱ्यात त्यांनी तिकडच्या भाजपा नेत्यांच्या गाठीभेटी घेतल्या आहेत. पक्ष बांधणीसाठी सक्रिय झालेल्या राज ठाकरे यांना भाजपाकडून एक विशेष भेट मिळाली आहे. त्यामुळे आता शिवतीर्थावर पंतप्रधान मोदींचा आवाज घुमणार आहे.

चंद्रपूर दौऱ्यावर असताना राज ठाकरे यांना भाजपा नेते आणि राज्याचे वने, सांस्कृतिक मंत्री सुधीर मुनगंटीवार यांनी एक खास भेट दिली आहे. त्यांनी राज ठाकरेंना एक स्केच आणि एक पत्र फ्रेम करुन दिलं आहे. शिवाय सोबत राष्ट्रध्वजाचं एक चिन्हंही आहे. यामध्ये पंतप्रधान मोदींचं रेकॉर्डेड भाषण ऐकू येतं. त्यामुळे आता राज ठाकरेंच्या शिवतीर्थ या निवासस्थानी रोज मोदींचं भाषण ऐकू येणार आहे.

विदर्भ दौऱ्यावर असताना राज ठाकरे अनेक भाजपा नेत्यांच्या गाठीभेटी घेताना दिसून आले. नागपुरात नितीन गडकरी यांची भेट घेत त्यांनी दौऱ्याची सुरुवात केली. दुसऱ्या दिवशी त्यांनी प्रदेशाध्यक्ष चंद्रशेखर बावनकुळे यांचीही भेट घेतली. तसंच मनसेच्या पुनर्बांधणीविषयीच्या महत्त्वाच्या घोषणाही त्यांनी यावेळी केल्या.