मुंबईः मालवण येथील राजकोट किल्ल्याजवळ बांधण्यात आलेला छत्रपती शिवाजी महाराजांचा पुतळा कोसळल्यानंतर राज्य सरकारने आता पुन्हा नव्याने हा पुतळा उभारण्याची मोहीम हाती घेतली आहे.

त्याचबरोबर पुतळा का कोसळला? त्याला जबाबदार कोण? हे निश्चित करण्यासाठी दोन स्वतंत्र समित्या स्थापन करण्याचे आदेश आज सार्वजनिक बांधकाम विभागाने काढले आहेत. नवीन पुतळा उभारण्यासाठी सार्वजनिक बांधकाम विभागाच्या अपर मुख्य सचिव मनिषा पाटणकर- म्हैसकर यांच्या अध्यक्षतेखाली तज्ज्ञांची समिती स्थापन करण्यात आली आहे.

हा पुतळा कोसळण्यामागची कारणे शोधण्यासाठी नौदलाचे वरिष्ठ अधिकारी कमांडर पवन धिंगरा यांच्या अध्यक्षतेखाली तांत्रिक समितीची घोषणा करण्यात आली आहे. कमांडर पवन धिंगरा यांच्या अध्यक्षतेखालील समिती पुतळा कोसळण्यामागील कारणांचा शोध घेणार आहे. तसेच या दुर्घटनेला जबाबदार कोण? याची दोष निश्चितीही करणार आहे. समितीने याबाबतचा अहवाल तत्काळ सरकारला सोपवावा असे सार्वजनिक विभागाने काढलेल्या आदेशात स्पष्ट करण्यात आले आहे.

या समितीमध्ये बांधकाम विभागाचे सचिव संजय दशपुते, सार्वजनिक बांधकाम विभागाचे माजी स्ट्रक्चरल डिझाईन मुख्य अभियंता विकास रामगुडे, अभियंता प्रा. जांगीड, प्रा. परीदा यांचा समावेश असेल.
मुख्यमंत्री एकनाथ शिंदे यांच्या अध्यक्षतेखाली दोनच दिवसांपूर्वी झालेल्या बैठकीत नव्याने पुतळा उभारण्याची घोषणा करण्यात आली होती. त्यानुसार नवीन पुतळा उभारण्यास वाव, संकल्पना, कार्यपद्धत निश्चितीसाठी शिफारशी करण्याकरिता समिती स्थापन करण्यात आली आहे.

निमंत्रितांमध्ये जयसिंगराव पवार
मनीषा पाटणकर-म्हैसकर यांच्या अध्यक्षतेखालील या समितीमध्ये सार्वजनिक बांधकाम सचिव (रस्ते) सदाशिव साळुंखे, नौदलाचे प्रतिनिधी कमांडर एम. दोराईबाबू, अभियंता प्रा. जांगीड, प्रा. परीदा, जे.जे. स्कूल ऑफ आर्किटेक्चरचे संचालक राजीव मिश्रा, सरखेल कान्होजी आंग्रे यांचे वंशज व मराठा आरमाराचे अभ्यासक राजे रघुजी आंग्रे, इतिहासकार जयसिंगराव पवार आणि इतर विशेष निमंत्रितांचा समावेश असेल.