मुंबई - 'भारिपचे नेते प्रकाश आंबेडकर कायम आडमार्गाने भारतीय जनता पक्षालाच मदत करत असतात, तर त्यांनी थेट भाजपला पाठिंबा द्यावा. त्याचा फायदा दलितांना होईल. पंतप्रधान नरेंद्र मोदींची ताकद आपण दोघे मिळून वाढवू,'' असे खुले आवतन देत रिपब्लिकन पक्षाचे नेते रामदास आठवले यांनी प्रकाश आंबेडकरांची कोंडी केली.

भारिप आणि एमआयएमबरोबरच्या राजकीय समीकरणांविषयी वेगवेगळी गृहितके मांडली जात आहेत. त्याच वेळी एकाच समाज घटकावर मतांचा दावा सांगणाऱ्या प्रकाश आंबेडकरांच्या नवीन राजकीय खेळीविषयी रामदास आठवलेंनी थेट प्रतिक्रिया व्यक्‍त करीत आंबेडकरांना आव्हान दिले आहे. एमआयएमबरोबर प्रकाश आंबेडकर गेल्यास त्याचा फायदा निश्‍चितच भाजपला होणार आहे. कॉंग्रेसनेच या युतीची काळजी करण्याची गरज आहे, असे ते म्हणाले. प्रकाश आंबेडकर हे नेहमीच भाजपला आडमार्गाने मदत करतात. त्यांनी एमआयएमबरोबर जाण्यापेक्षा भाजपबरोबर आल्यास दलितांना त्याचा फायदा होईल, असे मतही आठवलेंनी व्यक्‍त केले.

दलित-सवर्ण एकोप्यासाठी आंतरजातीय विवाहाची गरज
सरकार भाजपचे असो वा कॉंग्रेसचे, दलितांवर अत्याचार होत आहेत हे वास्तव असल्याची चिंता केंद्रीय सामाजिक न्याय राज्यमंत्री रामदास आठवले यांनी व्यक्‍त केली आहे. दलित-सवर्णांमध्ये एकोपा व्हावा, यासाठी आंतरजातीय विवाहांना प्रोत्साहन देण्याची गरजही आठवलेंनी व्यक्‍त केली.