कर्नाटक विधानसभा निवडणुकीच्या निमित्ताने झालेले प्रचारदौरे, सभांचा धडाका तसेच गेल्या काही दिवसांत राज्याच्या अनेक भागांत झालेल्या प्रवासाचा ताण या सर्व कारणांमुळे उपमुख्यमंत्री देवेंद्र फडणवीस यांची प्रकृती बिघडली. त्याचबरोबर प्रकृती अस्वास्थ्यामुळे त्यांनी मंगळवारचे सर्व कार्यक्रम रद्द करून विश्रांती घेतली असल्याच्या बातम्या काही वृत्त वाहिन्यांनी आणि वृत्तपत्रांनी चालवल्या होत्या मात्र या बातम्या खोट्या असल्याचं समोर आलं आहे.

'सकाळ'च्या सूत्रांनी दिलेल्या माहितीनुसार देवेंद्र फडणवीस यांचे कोणतेही कार्यक्रम रद्द झालेले नाहीत. भारतीय जनता पक्षाचे (भाजप) राष्ट्रीय अध्यक्ष जेपी नड्डा आजपासून दोन दिवसांच्या महाराष्ट्र दौऱ्यावर आहेत. यावेळी देवेंद्र फडणवीस नड्डा यांच्या स्वागतासाठी जाणार आहेत. नड्डा आज मुंबईत येणार असून उद्या पुण्यात होणाऱ्या राष्ट्रीय कार्यकारिणीच्या बैठकीला ते उपस्थित राहणार आहेत.

मे महिन्याच्या पहिल्या आठवड्यात देवेंद्र फडणवीस कर्नाटकाच्या दौऱ्यावर होते. त्यांनी तेथील भाजपच्या उमेदवारांसाठी अनेक सभा घेतल्या. कर्नाटकमधील प्रचार आटोपून मुंबईत आल्यानंतर त्यांनी अमरावती, भंडारा, नागपूर या जिल्ह्यांसह सोमवारी पुणे, पिंपरी-चिंचवडचा दौरा केला होता.

रणरणत्या उन्हात झालेल्या दौऱ्यांचा परिणाम फडणवीस यांच्या प्रकृतीवर झाला. त्यामुळे त्यांनी त्यांचे सर्व कार्यक्रम रद्द केल्याच्या बातम्या प्रसार माध्यमांमध्ये आल्या या बातम्या खोट्या असल्याचं समोर आलं आहे.

तर कल देवेंद्र फडणवीस काल प्रसार माध्यमांशी बोलत होते. त्याचबरोबर त्यांच्या ट्विटरवर त्यांनी एका कार्यक्रमाचा व्हिडिओ देखील ट्विट केला आहे. त्यामध्ये ते जमलेल्या लोकांशी संवाद साधतान दिसून येत आहेत.