सोलापूर : परराज्यातून कोणाच्यातरी ओळखीतून सोलापूर जिल्ह्यात येऊन वेश्या व्यवसाय करणाऱ्या ११ पीडितांची सुटका ग्रामीण पोलिसांच्या अनैतिक मानवी वाहतूक प्रतिबंध कक्षाने केली आहे. पीडितांमध्ये ठाणे, मुंबईसह पश्चिम बंगाल, कलकत्ता अशा राज्यातील २५ वयोगटातील मुली, महिलांचा समावेश असल्याचे पोलिसांनी सांगितले.

पोलिस कारवाईत सापडलेल्या महिला- मुली कौटुंबिक परिस्थिती हालाखीची असल्याने, पतीने सोडून दिले किंवा कोणीतरी फसवून वेश्या व्यवसायात आणले, अशा पीडिता आहेत. २४ जानेवारीपासून ग्रामीण पोलिसांच्या या कक्षाने बार्शी, मंगळवेढा, कुर्डुवाडी व माळीनगर रोड अशा ठिकाणी छापे मारले. बनावट ग्राहक पाठवून पोलिसांनी खात्री करूनच त्याठिकाणी छापे घातले आहेत.

विशेष बाब म्हणजे छाप्यात सापडलेल्या पीडितांना ना लिहायला ना वाचायला येते. पोलिसांनी जबाब घेतल्यानंतर स्वाक्षरी करण्याऐवजी बहुतेक पीडितांनी अंगठाच केल्याचेही अधिकाऱ्यांना पहायला मिळाले. दरम्यान, पीडितांना वेश्या व्यवसाय करायला लावून त्यांच्या कमाईवर स्वत:ची उपजिविका भागविणाऱ्या संशयितांना पोलिसांनी अटक केली आहे. त्या पीडिता नेमक्या त्यांच्यापर्यंत पोचल्या कशा, यामागे काही रॅकेट आहे का याचा शोध पोलिस घेत आहेत.

पळून गेलेल्या ३३ अल्पवयीन मुलींना शोधण्यात यश

३३ अल्पवयीन मुलींचाही शोध, सुरत, राजस्थान अशा ठिकाणी मुली प्रियकरासोबत पळून गेल्या होत्या. पोलिस ठाण्यात बेपत्ता मुलींसंदर्भातील फिर्याद दाखल झाल्यानंतर चार महिने त्याच ठिकाणी तपास होतो. पण, त्या काळात पोलिस ठाण्यातील तपास अधिकाऱ्यांना त्या मुली नाही मिळाल्या तर त्याचा तपास अनैतिक मानवी वाहतूक प्रतिबंध कक्षाकडे सोपविला जातो. या पथकाने मागील तीन वर्षांत ३३ मुलींना विविध ठिकाणाहून शोधून काढले. त्यांचे समुपदेशन करून त्यांच्या पालकांच्या स्वाधीन केले आहे.

ग्रामीण पोलिसांच्या ‘या’ पथकाची कामगिरी

पोलिस निरीक्षक बजरंग साळुंखे, पोलिस उपनिरीक्षक मोनाली पवार, मोतिराम मोरे, रेवणसिद्ध काळे, सहायक फौजदार मंजुळा धोत्रे, पोलिस हवालदार सविता कोकणे, सुर्यकांत जाधव, सचिन वाकडे, लक्ष्मण राठोड, पोलिस शिपाई प्रिती पाटील यांच्या पथकाने ही कामगिरी केली आहे.