नाशिक : ओबीसी समाजाच्या आरक्षणात विघ्नहर्ते कमी असून, विघ्न आणणारेच जास्त आहेत. लोकसंख्येच्या ५४ टक्के असलेला हा समाज एकत्र आल्यास राज्यासह देशात वेगळे चित्र निर्माण होईल. मात्र, आपसांतील भांडणांमुळे ही लढाई अवघड बनेल. ती जिंकण्यासाठी ओबीसींमधील विविध उपजातींनी एकत्र येणे व राहणे गरजेचे आहे. असे मत राज्याचे अन्नपुरवठा मंत्री व जिल्ह्याचे पालकमंत्री छगन भुजबळ यांनी येथे केले.

मल्हारराव होळकर जन्मोत्सवाचे औचित्य साधत धनगर समाजाचे नेते व राज्याचे सार्वजनिक बांधकाम राज्यमंत्री दत्तात्रय भरणे यांचा रविवारी नागरी सत्कार करण्यात आला. यावेळी भुजबळ अध्यक्षस्थानाहून बोलत होते. छोट्या समाजात नेता तयार होणे अवघड असतानाच आपसांतील लढाईमुळे ते कठीण होत असल्याचे सांगत सर्वांनी एकत्र राहण्याचा सल्लाही भुजबळ यांनी यावेळी दिला.

साहित्य संमेलन यशस्वीच

अखिल भारतीय मराठी साहित्य परिषदेचे अध्यक्ष प्रा. कौतिकराव ठाले- पाटील यांनी नाशिकच्या साहित्य संमेलनाच्या आयोजकांवर टीका केली होती. संमेलनाचे स्वागताध्यक्ष असलेल्या छगन भुजबळ यांनी या टीकेकडे लक्ष देत नसल्याचे वक्तव्य केले. भुजबळ म्हणाले, ‘‘नाशिकच्या संमेलनावर कितीही टीका झाली तरी हे संमेलन पुढील अनेक वर्ष साहित्यिक विसरणार नाहीत.’’