पुणे : ‘‘तथाकथित सांस्कृतिक मार्क्सवाद हे फक्त शब्द आहेत. त्यात संस्कृती नाही आणि मार्क्सदेखील नाही. त्यांनी मार्क्सला केव्हाच रद्द केला आहे. हे जागलेले नाहीत, तर वखवखलेले आहेत. त्यामुळे याची उत्तरक्रिया परंपरेने आपल्यालाच करावी लागेल,’’ अशा शब्दांत राष्ट्रीय स्वयंसेवक संघाचे सरसंघचालक डॉ. मोहन भागवत यांनी डाव्या विचारसरणीवर हल्ला केला.

लेखक अभिजित जोग लिखित ‘जगाला पोखरणारी डावी वाळवी’ या पुस्तकाचे प्रकाशन डॉ. भागवत यांच्या हस्ते झाली. दिलीपराज प्रकाशनातर्फे हे पुस्तक प्रकाशित करण्यात आले. त्या वेळी ते बोलत होते. नवी दिल्ली येथील जवाहरलाल नेहरू विद्यापीठाच्या कुलगुरू डॉ. शांतीश्री पंडित, प्रकाशन संस्थेचे व्यवस्थापकीय विश्वस्त राजीव बर्वे उपस्थित होते.

डॉ. भागवत म्हणाले, “डाव्यांविरोधात लढताना काहींना प्रतिकार करावा लागेल. भ्रमाचा पडदा फाडावा लागेल. खोटे उघडे करावे लागेल. लोकांनी भ्रमित होऊ नये, याची काळजीही घ्यायला हवी. आपण कोण आहोत, परंपरा काय, विचारधन, विज्ञान काय हे कळले पाहिजे. डाव्यांमुळे सगळे जग त्रस्त आहे. दडपले गेले आहे. ही लढाई लढणाऱ्यांसाठी हे पुस्तक म्हणजे पाठ्यपुस्तक आहे. प्रतिकारासह समाज प्रबोधन करावे लागेल. कालसुसंगत नव्या रूपात आपल्या शाश्वत मूल्यांच्या आधारावर उभे राहावे लागेल.”

आपला धर्म काय?

सत्य, करुणा, सुचिता, तपस या चतुःसूत्रीवर धर्म उभा आहे. त्याला कोणाचेही वावडे नाही. आपला समाज कोणत्या एका पोथीत बांधलेला नाही. आपल्या इतिहासाने एक प्रमाण मानून कधीच व्यवहार केलेला नाही. वेदांप्रमाणे सगळे आचरण करत नव्हते. तरीही सर्व जण धर्माने वागत होते, असेही डाॅ. भागवत यांनी स्पष्ट केले.

यावेळी बोलताना डॉ. पंडित म्हणाल्या, “डाव्यांनी त्यांची ‘इको-सिस्टीम’ तयार केली असून, संघ विचारच याचा पराभव करू शकेल. आपण आपल्या संस्कृतीविषयी अभिमान बाळगला पाहिजे. आपण हिंदू आहोत आणि एका उज्ज्वल परंपरेचे पाईक आणि वारसदार आहोत, याचा गर्व बाळगला पाहिजे.”