छत्रपती संभाजीनगर : भाजपच्या सध्याच्या राजकीय धोरणांवर राष्ट्रीय स्वयंसेवक संघाच्या पदाधिकाऱ्यांनी उपमुख्यमंत्री देवेंद्र फडणवीस यांच्यासमोर तीव्र नाराजी व्यक्त केली आणि जुन्या कार्यकर्त्यांना मुख्य प्रवाहात स्थान देण्यात यावे, अशी भूमिका मांडली; तसेच पक्षाचा 'ग्राउंड लेव्हल' संपर्क कमी झाल्याचेही निदर्शनास आणून दिले.
उपमुख्यमंत्री देवेंद्र फडणवीस दोन दिवसांपूर्वी छत्रपती संभाजीनगरच्या दौऱ्यावर असताना त्यांनी संघाच्या प्रभावशाली पदाधिकाऱ्यांशी चर्चा केली. यावेळी मंत्री अतुल सावे यांची उपस्थिती होती. बैठकीत संघाने फडणवीस यांना स्पष्ट शब्दांत आपल्या भावना सांगितल्या. त्यानुसार त्यांनी भाजपची राज्यात नेमकी काय अवस्था आहे, हे थेट सांगितले.
संघाच्या एका ज्येष्ठ पदाधिकाऱ्याने दिलेल्या माहितीनुसार, फडणवीस यांना विधानसभा निवडणुकीपूर्वी नेमके काय करायला हवे, याबाबतही सूचना केल्या.
संघाच्या पदाधिकाऱ्यांनी फडणवीस यांच्या निदर्शनास आणून दिले, की पक्षाचा वास्तव परिस्थितीशी असलेला संपर्क कमी झाला आहे. भाजपने आता जमिनीवरील वास्तव जाणून घेतले पाहिजे. यासाठी आता जुन्या कार्यकत्यांना पुन्हा मुख्य प्रवाहात आणले पाहिजे. आतापर्यंत जे झाले ते झाले, पण आता त्यात बदल केल्याशिवाय पर्याय नसल्याचे त्यांनी सांगितले.
सर्वांना सांभाळा, कुणाला डावलू नका मराठा, दलित आणि मुस्लिम दुखावल्याने लोकसभेत भाजपला फटका बसला होता. विशिष्ट समाज अथवा जातींबाबत असलेली भूमिका बदलण्याची गरज असल्याचे नमूद करीत सर्व समाजांतील सर्व घटकांना सांभाळा, त्यांना डावलून चालणार नाही, असे स्पष्ट केले. मात्र, हे करतानाच हिंदुत्वाची लाइन सोडू नका, असा सल्लाही दिला.
लोकसभा निवडणुकीच्या काळात भाजप अध्यक्ष जे.पी. नड्डा यांनी आता भाजपला संघाच्या मदतीची गरज राहिलेली नाही, असे विधान करून खळबळ उडवून दिली होती.
लोकसभा निकालानंतर भाजपने पुन्हा एकदा संघाशी जुळवून घेण्याचा निर्णय घेतला आहे. त्याचाच एक भाग म्हणून राज्यात संघाच्या पदाधिकाऱ्यांसोबत अशा बैठका आयोजित केल्या जात आहेत.
छत्रपती संभाजीनगरच्या बैठकीतही संघ परिवाराच्या पदाधिकाऱ्यांनी भाजपने संघ परिवाराशी अधिक समन्वय ठेवणे आवश्यक असल्याचे स्पष्ट सुचविले.
येत्या विधानसभा निवडणुकीसाठी संघाने भाजपकडून पक्ष काय करणार आहे, हे जाणून घेतले व बूथनिहाय संघाचे कार्यकर्ते कामाला लावण्याची रणनीती तयार केल्याचे सांगण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.