सोलापूर : ज्या कार्यकर्त्यांच्या मेहनतीमुळे आपण सत्तेत बसलो, मला मंत्री होण्याची संधी मिळाली, त्यांच्यासाठी महिन्यातून दोन दिवसांचा वेळ सोलापुरातील भाजप पक्ष कार्यालयात देईन, अशी ग्वाही पालकमंत्री जयकुमार गोरे यांनी दिली.

सोलापूर शहरातील लिंगशेट्टी मंगल कार्यालयात गुरुवारी (ता. ३) भाजप संघटन पर्व अभियानांतर्गत सोलापूर शहर, सोलापूर पूर्व व सोलापूर दक्षिण येथील पदाधिकाऱ्यांची बैठक झाली. यावेळी पालकमंत्री श्री. गोरे यांनी मार्गदर्शन केले. व्यासपीठावर आमदार सुभाष देशमुख, समाधान आवताडे, देवेंद्र कोठे, पश्चिम महाराष्ट्राचे संघटन मंत्री मकरंद देशपांडे, माजी खासदार अमर साबळे, शहराध्यक्ष नरेंद्र काळे, चेतनसिंह केदार, दीपक नागपुरे, नारायण बनसोडे, शशिकांत चव्हाण, संजय कोळी, विक्रम देशमुख उपस्थित होते. उपस्थितांना श्री. देशपांडे यांनी भाजपचे संघटनात्मक काम व ६ आणि १४ एप्रिल रोजी घ्यावयाच्या कार्यक्रमाची रूपरेषा व नियोजन सांगितले.

यावेळी सोलापूर पूर्वमधील पंढरपूर, अक्कलकोट, दक्षिण सोलापूर, मोहोळ या मतदारसंघातील एक हजार २२३ पैकी १५ बुथ समित्या निवडल्याचे सांगण्यात आले. याठिकाणी पूर्वी नऊ मंडले होती, आता १२ मंडले होतील. सोलापूर दक्षिणमध्ये (बार्शी, करमाळा, माढा, सांगोला) १६८५ बुथ असून त्यातील ९६८ बुथ कमिट्यांच्या निवडी झाल्याचे सांगण्यात आले. आगामी निवडणुकीच्या अनुषंगाने जिल्ह्यात ३४ मंडले वाढतील, असेही सांगण्यात आले.

व्यासपीठावर लाडकी बहीण नसल्याची खंत

राज्यात भाजप महायुतीला लाडक्या बहिणींमुळे सत्ता मिळाली, सगळीकडे त्यांना ५० टक्के आरक्षण देखील आहे. परंतु, आज भाजप पदाधिकाऱ्यांच्या मेळाव्याप्रसंगी व्यासपीठावर एकही लाडकी बहीण (महिला पदाधिकारी) नसल्याची खंत पालकमंत्री गोरे यांनी व्यक्त केली.

-----------------------------------------------------------------------

गावातील कार्यकर्त्यांना मिळतील कामे

जिल्हा नियोजन समिती, संजय गांधी निराधार योजनेसह अन्य शासकीय योजनांच्या समित्या व विविध महामंडळांवर भाजपचे असंख्य कार्यकर्ते इच्छुक आहेत. त्या सर्वांना संधी मिळणे कठीण आहे, पण माझ्याकडे जे खाते आहे, त्यातून मी गावागावातील भाजप कार्यकर्त्यांना सभामंडप, स्मशानभूमीचा रस्ता, ५४-१५चा रस्ता, अशी कामे देऊन बळ देण्याचे काम करेन, अशी ग्वाही पालकमंत्र्यांनी यावेळी दिली.

-------------------------------------------------------------------

‘जिल्हा नियोजन समिती’साठी इच्छुकांची ढीगभर यादी

जिल्हा नियोजन समितीमध्ये १८ निमंत्रित सदस्यांच्या निवडी पालकमंत्र्यांच्या शिफारसीवरून होतात. त्यात उपमुख्यमंत्री अजित पवार यांची राष्ट्रवादी, उपमुख्यमंत्री एकनाथ शिंदे यांची शिवसेना व भाजप या तिन्ही पक्षांचे पदाधिकारी घ्यावे लागणार आहेत. त्यात भाजपच्या वाट्याला १० सदस्य येण्याची शक्यता आहे. पण, पालकमंत्री म्हणाले, जिल्हा नियोजन समितीवरील इच्छुकांच्या नावांची ढिगभर यादी माझ्याकडे आली आहे. त्यातील कोणाला संधी द्यायची याचा निर्णय पक्षश्रेष्ठींकडून होईल.

----------------------------------------------------------------------------

भर बैठकीत एकजण उठला अन्‌...

भाजपच्या संघटन पर्वची बैठक सुरू असताना एक ज्येष्ठ कार्यकर्ता उठला आणि थेट व्यासपीठासमोर पोचला. त्यावेळी पक्ष वाढविण्यासाठी आम्ही ३५ ते ४० वर्षे घालवली, पण आम्हाला पक्षात किंमत मिळत नसल्याची खंत बोलून दाखविली. त्यावेळी त्यांना सर्वांनी बसायला सांगितले.