Mumbai News: ‘‘उपमुख्यमंत्री देवेंद्र फडणवीस यांनी त्यांच्यावरील आरोपाला उत्तर देण्यासाठी सचिन वाझे आणि परमवीर सिंग या दोन पोलिस अधिकाऱ्यांना पुढे केले असले तरी या मागचे खरे सूत्रधार हे फडणवीस हेच आहेत,’’ असा आरोप माजी गृहमंत्री अनिल देशमुख यांनी केला आहे.

‘एक्स’वरील पोस्टमध्ये ते म्हणाले, की ‘फडणवीस यांनी तत्कालीन मुख्यमंत्री उद्धव ठाकरे आणि आदित्य ठाकरे यांना तुरुंगांत टाकण्यासाठी कटकारस्थान रचले असल्याचा कटाचा खुलासा मी १५ दिवसांपूर्वी केला होता. त्यांच्या कटाची जाहीर वाच्यता जनतेसमोर केल्यावर त्यांनी माझ्यावर आरोप करण्यासाठी जो देशद्रोहाच्या व दोन खुनाच्या गुन्ह्यांमध्ये तीन वर्षांपासून तुरुंगामध्ये आहे, असा सचिन वाझे तसेच ज्याने तीन वर्षांपूर्वी उद्योगपती मुकेश अंबानी यांच्या घरासमोर मोटारीत बाँब ठेवले आणि नंतर गाडीच्या मालकाची हत्या केली अशा गुन्ह्याचा सूत्रधार असलेल्या परमवीर सिंग यांना फडणवीस यांनी आता पुढे केले आहे.’’

‘‘फडणवीस यांच्या सांगण्यावरून वाझे व परमवीर सिंग हे पोपटासारखे बोलत आहे. वरील दोन्ही प्रकरणाचा मूळ सूत्रधार परमवीर असल्यामुळे आम्ही त्याला तीन वर्षांपूर्वी निलंबित केले होते. त्याला केंद्रीय यंत्रणेकडून अटक होणार होती. पण तो भाजपला शरण गेला आणि आता आरोप करीत आहे,’’ असे देशमुख यांनी म्हटले आहे.