मुंबई : राज्याचे पर्यावरण मंत्री आदित्य ठाकरे (Aditya Thackeray) अयोध्या दौऱ्यावर गेले असून, त्यांच्या या दौऱ्यावर सदाभाऊ खोत (Sadabhaou Khot) यांनी बोचरी टीका केली आहे. खोत म्हणाले की, तुम्ही रामाकडे जावा नाही, तर काशीत अंघोळ करा, राज्यातील जनतेच्या मनातून तुम्ही संपला आहात असा खोचक टोला सदाभाऊ खोत यांनी शिवसेनेला लगावला आहे. (Sadabhaou Khot On Aditya Thackeray Ayodhya Tour)

सरकारने जनतेच्या प्रश्नावर बोलायला पाहिजे पण मुख्यमंत्री घरात बसतात आणि युवराज देश वाऱ्या करत असतात. ज्यांनी अयोध्येच्या मंदिराच्या वर्गणीमध्ये भ्रष्टाचार केल्याचे आरोप केले आणि गोंधळ घातला ते आज अयोध्येच्या स्वारीवर गेले असल्याचेही खोत म्हणाले.

जे राम मंदिर बांधायची यांच्यात हिम्मत नाही असे म्हणाले तेच आता आयोध्येला निघाले आहेत. म्हणजे यांना रामाचाही जप करायचा आहे आणि काँग्रेस वगैरे आहेत त्यांना हिरवे झेंडे खांद्यावर घेऊन नाचायचे आहे.

एका म्यानात दोन तलवारी राहतील कशा? आता त्या राहू शकत नाहीत. मग तुम्ही रामाला जावा नाही तर, काशीला जाऊन आंघोळ करा. महाराष्ट्राच्या जनतेच्या मनातून तुम्ही संपलेले आहात असे वक्तव्य खोत यांनी केले आहे.