मागील काही दिवसांपासून पेट्रोल आणि डिझेलचे दर सातत्याने वाढत होते. गेले काही दिवस इंधन दरवाढीमुळे सामान्य नागरिक सतंप्त झाले आहेत. मात्र दिवाळीच्या मुहूर्तावर केंद्राने पेट्रोल आणि डिझेलचे दर कमी केले आहेत. केंद्राच्या या निर्णयाचे अनेक राज्यांनी स्वागत करत दर कमी केले आहेत. मात्र राज्यातील महाविकास आघाडी सरकारने यावर कोणताही ठोस निर्णय घेतलेला नाही. राज्यसरकारच्या या भूमिकेमुळे विरोधकांकडून त्यांच्यावर टीका सुरु आहे. दरम्यान, शेतकरी नेते सदाभाऊ खोत यांनी शिवसेनेचे खासदार संजय राऊत यांच्यावर ट्वीटद्वारे सडकून टीका केली आहे.

ते म्हणतात, खासदार राऊत साहेब, इंधन दरवाढीसंदर्भातील निर्णयात केंद्राने एक पाऊल पुढे टाकत पेट्रोल डिझेलचे दर कमी केले आहेत. आपण महाराष्ट्रातील जनतेच्या खिशातून प्रति लिटर 35 ते 40 रुपये काढत आहात. त्यातील आपण आपली वसुली कमी करणार आहेत का? ती जर तुम्ही कमी करू शकत नसाल, तर आम्हालाही नाईलाजाने म्हणावे लागेल की 'आपले मन हे किडके मन आहे', असा चिमटा त्यांनी काढला आहे.

दरम्यान, केंद्र सरकारने पेट्रोल आणि डिझेलचे दर कमी केल्यानंतर संजय राऊत यांनी प्रतिक्रीया दिली होती. यात ते म्हणाले होते, पेट्रोल ५० रुपयाने कमी करायचं असेल तर देशभरात भाजपाचा पराभव करावा लागेल. केंद्र सरकारचं मन हे मोठं नाही तर सडकं आहे, मन मोठं असतं, तर पेट्रोल २५ रुपयान कमी केलं असतं. त्यांच्या या टीकेली सदाभाऊ खोत यांनी प्रतित्त्युर दिले आहे.