Sakal Survey : अजित पवार यांनी राष्ट्रवादीमध्ये बंड केलं आणि सत्तेत सहभागी झाले. त्यांना उपमुख्यमंत्रीपद तर त्यांच्यासोबत राष्ट्रवादीच्या ८ मंत्र्यांना मंत्रीपदे मिळाले. तर बरोबर एका वर्षापूर्वी एकनाथ शिंदे यांच्या रूपाने शिवसेनेत बंड झालं होतं.

त्यानंतर आता विरोधक कोण आणि सत्ताधारी कोण असे अनेक प्रश्न जनतेला पडले आहेत. आपल्या मनातील या सर्व प्रश्नांबद्दल जनतेला काय वाटतं यावर सकाळ माध्यमाने सर्वेक्षण केलं आहे. महाराष्ट्रातील ७३ हजार ३३० लोकांचा कल घेण्यात आला आहे. यामध्ये प्रत्येक वेगवेगळ्या वयोगटातील महिला आणि पुरूष मतदारांचे मत घेण्यात आले आहेत.

फोडाफोडीच्या राजकारणानंतर 2024 विधानसभा निवडणुकीत कौल कोणाला? २०२४ विधानसभा निवडणुकीत CM कोण होणार? शरद पवार विरुद्ध अजित पवार: कोणाची बाजू योग्य? वेगळा गट करून सत्तेत सहभागी होण्याचा पायंडा मान्य आहे का? शरद पवारांना सहानुभूतीचा फायदा होईल का? लोकसभा आणि विधानसभा निवडणूक एकत्र झाल्यात एकाच पक्षाला मत देणार का? या सर्व प्रश्नांवर जनतेने आपली मत मांडली आहेत.

वेगळा गट करून सत्तेत सहभागी होण्याचा पायंडा मान्य आहे का?

पक्षातून वेगळा गट करून सत्तेत सहभागी होण्याचा पायंडा जास्तीत जास्त लोकांना मान्य नसल्याचं या सर्वेक्षणातून दिसून आलं आहे. ७४ हजार ३३० मतदारांना हा प्रश्न विचारण्यात आला होता. त्यापैकी जवळपास ८०.९ टक्के जनतेला हा पायंडा मान्य नसून १९.१ जनतेने यासाठी सहमती दर्शवली आहे.

निवडणुकीनंतर पक्षांतर करणाऱ्या आमदारांबद्दल जनतेचं मत

पक्षांतर करणाऱ्या आमदारांबद्दल जनतेमध्ये असंतोष असून जास्तीत जास्त लोकांनी थेट निशाणा साधला आहे. या प्रश्नावर ७३ हजार ३१२ मतदारांनी मते नोंदवली असून "पक्षांतर करणाऱ्या आमदारांनी आमदारकीचा राजीनामा देत पुन्हा निवडणूक लढवावी" असं मत ३८.७ टक्के जनतेने व्यक्त केलं आहे. "नेत्यांची राजकीय अपरिहार्यता मान्य आहे असं म्हणणारे" १३.३ टक्के लोकं आहेत. तर ३०.१ टक्के लोकांचं "कायमस्वरूपी निवडणूक लढवण्यावर बंदी आणावी" असं मत आहे.

शिवसेना पक्ष (शिंदे आणि उद्धव ठाकरे दोन्ही गट) सत्तेत यावा असे मानणाऱ्या मतदारांचा कल:

आमदारकीचा राजीनामा देऊन पुन्हा निवडणूक लढवावी असं 39 % मतदारांचे मत आहे तर या शिवसेनेच्या फुटीर आमदारांवर कायमस्वरूपी निवडणुक लढविण्यावर बंदी आणावी असं 33% लोकांचा म्हणणं आहे. नेत्यांची राजकीय अपरिहार्यता मान्य आहे असं 12 % मतदारांचे मत आहे.