मुंबईः सामाजिक कार्यकर्त्या अंजली दमानिया यांनी शनिवारी छगन भुजबळ यांच्या सांताक्रूझ येथील निवासस्थानी पत्रकार परिषद घेण्याचा प्रयत्न केला होता. परंतु पोलिसांनी त्यांना रोखलं. भुजबळांनी फर्नांडिस कुटुंबियांचं घर लाटलं आणि त्याजागी टोलेजंग इमारत बांधली, शिवाय मोबदला देण्याचं कबुल करुनही पैसे दिले नाही. असा आरोप दमानियांनी केला.

या आरोपांवर शनिवारीच छगन भुजबळ यांनी प्रतिक्रिया दिली होती. आता रविवारी समीर भुजबळ यांनी पत्रकार परिषद घेऊन सर्व आरोप खोडून काढले आहेत. ते म्हणाले की, आम्ही फर्नांडिस कुटुंबियांचा मोबदला रहेजा आणि नरोना यांना दिला होता. पुन्हा एकदा जेव्हा इमारतीचं काम पूर्ण झालं तेव्हा २०१४ मध्ये मोबदला घ्या म्हणालो होतो.

तेव्हा त्यांनी संपूर्ण कागदपत्रांवर सह्या केलेल्या होत्या. पुन्हा त्यांनी येऊन इंटरेस्ट नसल्याचं सांगितलं होतं. आम्ही जो सहानुभूतीपूर्वक मोबदला देणार होतो, तो राहून गेला. जागा घ्या किंवा पैसे घ्या.. म्हणत होतो. परंतु त्यांचं उत्तर आलं नाही.

भुजबळ पुढे म्हणाले, दमानिया यांनी आमच्यावर अनेक आरोप केलेले होते. त्यानंतर आमच्या अनेक प्रॉपर्टी ईडीने अॅटॅच केलेल्या आहेत. त्यातच ही इमारतदेखील जोडली गेलेली आहे. आता दमानिया यांनी आमच्याविरोधाक कटकारस्थान रचण्याचं काम केलं आहे. प्रकरण कोर्टात असून कोर्ट जो निकाल देईल, तो आम्हाला मान्य असेल.

छगन भुजबळ काय म्हणाले होते?

अंजली दमानिया यांच्याबद्दल मी अधिक काही बोलणार नाही. सुपारी घेऊन बोलणाऱ्या लोकांबद्दल मी काय बोलणार? आम्ही कुणाचंही घर लाटलेलं नाही. या प्रकरणाची केस कोर्टामध्ये सुरु असून जो निकाल येईल, तो आम्हाला मान्य असेल.