Sangamner Bus Stand:संगमनेर शहराच्या वैभवात भर घालणाऱ्या हायटेक बसस्थानकात चोऱ्याया नित्याच्याच झाल्या आहेत. सीसीटीव्ही आणि पोलिस असतानाही महिलेच्या बॅगमधून अज्ञात चोरट्याने सहा तोळे सोन्याचे दागिने, रोख रक्कम, मोबाइल व एटीएम कार्ड चोरून नेले आहे. ही घटना गुरुवारी (ता.९) रोजी सायंकाळी साडेपाच वाजेच्या दरम्यान घडली.त्यामुळे सीसीटीव्ही कॅमेरे केवळ शोभेचे वस्तू ठरले आहे. यामुळे पोलिसांच्या कार्यक्षमतेवरही प्रश्नचिन्ह निर्माण होत आहे.

कुसूम सर्जेराव माघाडे (वय ७६) या वयोवृद्ध महिला शहरातील गणेशनगर येथील रहिवाश आहेत. त्या गुरुवारी सायंकाळी दिवाळीनिमित्त आपल्या मुलाकडे लोणी येथे जाण्यासाठी संगमनेर बसस्थानकात आल्या होत्या.

त्याच दरम्यान त्या बसमध्ये बसत असताना चोरट्याने गर्दीचा फायदा घेत त्यांच्या बॅगेमधील असलेला तीन तोळे सोन्याचा राणी हार, एक तोळा सोन्याचे मिनी गंठन,दोन तोळे वजनाची सोन्याची चेन, मोबाइल व रोख रक्कम असा सर्व मुद्देमाल चोरून पोबारा केला आहे.याप्रकरणी कुसूम माघाडे यांनी दिलेल्या फिर्यादीवरून अज्ञात चोरट्याविरुद्ध शहर पोलिसात गुन्हाही दाखल करण्यात आला आहे.

दरम्यान संगमनेर बसस्थानकाचा राज्यभर लौकिक आहे. परंतु, यापूर्वीही सातत्याने महिलांच्या गळ्यातील सोन्याचे गंठन चोरून नेल्याच्या घटना घडल्या असल्याचे समोर आले आहे. बसस्थानकात चोऱ्या होऊ नये म्हणून सीसीटीव्ही कॅमेरेही बसविण्‍यात आले आहे. शहर पोलिस ठाण्याचे काही पोलिसही तैनात करण्यात आले आहे. मात्र असे असतानाही महिलांचे दागिने चोरी होण्याच्या घटना घडतच आहे.

त्यातच सध्या दीपावली सणाची धामधूम सुरू आहे. त्यामुळे गर्दी वाढली आहे. अशा स्थितीत चोरटे बसमध्ये चढ-उतार करणाऱ्या प्रवासी महिलांचे दागिने चोरून नेत आहे. त्यामुळे महिलांमध्ये भीतीचे वातावरण निर्माण झाले आहे. सीसीटीव्ही कॅमेरे केवळ शोभेचे बाहुले ठरत असून, पोलिसांच्या कार्यक्षमतेवरही प्रश्नचिन्ह निर्माण होत आहे.

संगमनेर येथील बसस्थानकात चोऱ्या होवू नये म्हणून आठ सीसीटीव्ही कॅमेरे बसविण्यात आले. मात्र ते कमी पडत आहे म्हणून आणखी चौदा सीसीटीव्ही कॅमेरे बसविण्यात यावे यासाठी वरिष्ठ विभागाकडे दोनदा पाठपुरावा केला आहे.- प्रशांत गुंड, आगारप्रमुख