मुंबई : गोवा विधानसभा निवडणुकीत (Goa Assembly Election) दिवंगत नेते मनोहर पर्रीकर (Manohar Parrikar) यांचा मुलगा स्वतंत्र लढत असेल तर इतर पक्षांनी त्यांना पाठिंबा द्यावा, असं संजय राऊत (Sanjay Raut) म्हणाले होते. आम्ही उत्पल पर्रीकर यांना तिकीट दिलं तर शिवसेना पाठिंबा देईल का? असा प्रश्न भाजपकडून विचारण्यात आला होता. त्यालाच आता संजय राऊतांनी उत्तर दिलं आहे.

गोव्यात मनोहर पर्रीकर यांचं मोठ काम आहे. गोव्यात भाजप हे पर्रीकरांच्या नावाने ओळखले जाते. तेच लोक आज त्यांचा मुलगा उत्पल पर्रीकरांची लायकी काढतात. त्यांच्या मुलाचा अपमान करतात. भाजप पणजीतून ड्रग्स माफियांना तिकीट देत आहे. पण, पर्रीकरांच्या मुलांचा अपमान करत आहे, अशी टीका संजय राऊतांनी केली.

भाजपने उमेदवारी दिली तर शिवसेना पाठिंबा देईल का? या भाजपच्या प्रश्नाला उत्तर देताना राऊत म्हणाले, '' भाजपने आधी उत्पल पर्रीकर यांना उमेदवारी द्यायला पाहिजे. तिकीट देऊ असं बोलायला इतका वेळ का लागला? जे बोलतात तिकीट देऊ त्यांनी कधीच दिलं असतं किंवा नाकारलं असतं. पण, तिकीट कोणाला द्यायचं हे त्यांच्या हातात नाही. त्यांनी उत्पल पर्रीकर यांचं तिकीट का थांबवलं आहे?'' असा सवाल राऊतांनी उपस्थित केला.

उत्पल पर्रीकरांना पाठिंबा का द्यावा असं का म्हटलं? -

उत्पल पर्रीकर हे गोवा विधानसभा निवडणुकीत स्वतंत्र लढणार असतील तर भाजप वगळून सर्व पक्षांनी त्यांना पाठिंबा द्यावा, असा प्रस्ताव संजय राऊतांनी तृणमूल काँग्रेस, आप आणि गोवा फॉरवर्ड पार्टी या तिन्ही पक्षांसमोर प्रस्ताव ठेवला. पण, त्यांनी असं का केलं? असा प्रश्न विचारला असता, एखाद्या नेत्याबद्दल सहानुभूती असते. तशी मनोहर पर्रीकर यांच्याबद्दल आहे. त्याच सहानुभूतीपोटी बोललो असल्याचे संजय राऊत म्हणाले. तसेच गोवा अत्यंत लहान राज्य आहे. त्यामुळे गोव्यात कोणालाच बहुमत मिळणार नाही, असंही राऊत म्हणाले.