मुंबई : शिवसेनेचे खासदार संजय राऊतांना ईडीने अटक केल्यानंतर त्यांचे बंधू आमदार सुनील राऊतांनी माध्यमांना प्रतिक्रिया दिली आहे. यावेळी काही लोकांनी ईडीला घाबरून शिंदे गट गाठला पण संजय राऊत हा शिवसेनेचा निष्ठावंत सैनिक आहे. तो न घाबरता, न जुमानता ईडीच्या कारवाईला सामोरे गेला आहे आणि यातूनही तो सरसलामतपणे बाहेर पडेल असं सुनील राऊत म्हणाले आहेत.

संजय राऊत ज्या प्रकारे या कारवाईला दबावाला बळी न पडता सामोरे गेले त्यामुळे सर्वांना त्यांचा अभिमान आहे. यामुळेच उद्धव ठाकरे माझ्या आईला आणि कुटुंबियांना भेटले आहेत. सध्या ईडीने ज्या प्रकरणात समन्स दिलं होतं त्यासंदर्भात त्यांची चौकशी चालू असून त्याला उत्तर ते देतील असंही सुनील राऊत म्हणाले आहेत.

दरम्यान, पत्रा चाळ प्रकरणात प्रविण राऊत यांच्याकडून संजय राऊतांच्या पत्नीच्या अकाऊंटवरून पैसे आल्याचा आरोप होत असून ते राऊत यांचे नातेवाईक आहेत का? या आरोपावर बोलताना सुनील राऊत म्हणाले की, प्रविण राऊतांवर कारवाई झाली पण त्यांचं आडनाव राऊत आहे म्हणून ते काय आमच्या कुटुंबातले झाले का? असा सवाल करत संजय राऊतांना राजकीय सूडबुद्धीने अडकवण्याचा प्रयत्न केला जात असल्याचा आरोप त्यांनी केला आहे.

ईडीकडे पुरावे नसताना कोणतेही आरोप लावले जात आहेत. हे खरेखुरे आरोप नसून राजकीय आरोप आहेत. भावना गवळींवर सुद्धा आरोप झाले होते पण त्या शिंदे गटात गेल्यावर त्यांची चौकशी बंद झाली. असं का घडतं? हा सगळा भाजपचा खेळ असल्याचाआरोप संजय राऊतांचे बंधू सुनील राऊत यांनी केला आहे.