मुंबई: शिवसेनेचे खासदार संजय राऊत यांना तब्बल १०० दिवसांनंतर जामीन मिळाला आहे. त्यांना पीएमएलए कोर्टाकडून जामीन मंजूर झाला आहे. कथित पत्राचाळ घोटाळा प्रकरणात संजय राऊत यांना अटक करण्यात आली होती. जामीन मिळाल्यामुळे आता राऊत आगामी काळात सत्ताधारी भाजप आणि शिंदे गटावर हल्लाबोल करणार हे निश्चित आहे. शिवाय ते काँग्रेसनेते राहुल गांधी यांच्या भारत जोडो यात्रेत सामील होणार हे निश्चित मानलं जात आहे.

दोन दिवसांपूर्वी उद्धव ठाकरे यांना भारत जोडो यात्रेत सहभागी होणार का, असा प्रश्न विचारला होता. त्यावर उद्धव ठाकरे यांनी आपलं नियोजन वेगळं आहे. मात्र शिवसेनेचे ज्येष्ठ नेते राहुल गांधी यांच्या नेतृत्वातील भारत जोडो यात्रेत सामील होणार असल्याचं म्हटलं आहे. शिवाय आदित्य ठाकरे यांनी आधीच भारत जोडो यात्रेत सामील होणार असल्याचं सांगितलं आहे.

दरम्यान आज संजय राऊत कारागृहातून बाहेर आले आहेत. संजय राऊत यांचं जल्लोषात स्वागत करण्यात येत आहे. शिवाय काँग्रेसने देखील संजय राऊत यांच्या सुटकेनंतर आनंद व्यक्त केला आहे. त्यामुळे संजय राऊत सहाजिकच भारत जोडो यात्रेत सामील होणार अशा चर्चा सुरू झाल्या आहे. याआधी देखील दिल्लीतील एका आंदोलनात संजय राऊत राहुल गांधींसोबत सामील झाले होते.