राज्यातील शाळांच्या सुट्ट्यांमध्ये राज्य शासनाने बदल केला आहे. आता या शाळांना (Diwali Holiday)दिवाळीची सुट्टी 28 ऑक्टोंबर ते 10 नोव्हेंबर या कालावधीत राहणार आहे. यापूर्वी जाहीर झालेल्या सुट्टीनुसार अनेक शाळांनी परीक्षेचे वेळापत्रक तयार केले होते. मात्र आता बदललेल्या तारखांमुळे काही भागातील शाळांमध्ये गोंधळाची स्थिती निर्माण झाली आहे.

यापूर्वी राज्यातील शाळांना 1 नोव्हेंबर ते 20 नोव्हेंबर या कालावधीत दिवाळीची सुट्टी असेल असा आदेश शिक्षण संचालक पुणे यांनी 20 एप्रिल रोजी काढला होता. त्यानुसार अनेक शाळांनी आपले प्रथम सत्राच्या परीक्षांचे वेळापत्रक तयार केले होते. परंतु या सुट्ट्यांमध्ये आज अचानक बदल करण्यात आला व ही सुट्टी 28 ऑक्‍टोबर ते 10 नोव्हेंबर या कालावधीसाठी ठेवण्यात आली आहे. काही जिल्ह्यांमध्ये आठवी ते दहावीच्या प्रथम सत्राच्या परीक्षा सध्या सुरू आहेत. या परीक्षा 30 ऑक्‍टोबरपर्यंत सुरू राहणार होत्या. मात्र आज अचानक उद्या पासून सुट्टी देण्याचा आदेश आल्यामुळे अशा शाळांच्या मध्ये गोंधळाची स्थिती निर्माण झाली आहे.