तात्या लांडगे

सोलापूर : इयत्ता अकरावी प्रवेशाची दुसरी गुणवत्ता यादी आज गुरुवारी जाहीर होणार असून ज्या विद्यार्थ्यांना पसंतीक्रमानुसार आवडीचे महाविद्यालय मिळेल, त्यांनी १८ ते २१ जुलै या काळात प्रवेश घ्यावा लागणार आहे. आतापर्यंत अकरावी प्रवेशासाठी १४ लाख १० हजार विद्यार्थ्यांनी नोंदणी केली असून त्यातील पाच लाख सात हजार २८८ विद्यार्थ्यांनी प्रवेश घेतले आहेत.

अकरावी प्रवेशाची ऑनलाइन प्रक्रिया १० ऑगस्टपूर्वी संपविली जाणार आहे. शून्य प्रवेश फेरीनंतर पहिली गुणवत्ता यादी जाहीर झाल्यानंतर गुरुवारी (ता. १७) दुसरी यादी प्रसिद्ध होणार आहे. यादी प्रसिद्ध झाल्यानंतर विद्यार्थ्यांना १८ ते २१ जुलैपर्यंत प्रवेश घ्यावे लागणार आहेत. प्रवेशानंतर २३ जुलैला रिक्त जागा प्रसिद्ध होतील. त्यानंतर २४ ते २७ जुलैपर्यंत प्रवेश न मिळालेल्या विद्यार्थ्यांना पुन्हा महाविद्यालयांचे पसंतीक्रम बदलता येणार आहेत. याचवेळी ज्यांचे अर्ज अपूर्ण आहेत किंवा ज्यांनी प्रवेशासाठी अर्ज केलेले नाहीत त्यांना नव्याने नोंदणी करता येणार आहे.

२८ जुलै रोजी तिसरी गुणवत्ता यादी प्रसिद्ध होणार असून त्यानंतर पुढील चार दिवसांत त्या विद्यार्थ्यांना प्रवेश घ्यावे लागतील. आवश्यकता भासल्यास चौथी गुणवत्ता यादी प्रसिद्ध होईल, असे माध्यमिक व उच्च माध्यमिक शिक्षण विभागातील वरिष्ठ अधिकाऱ्यांनी सांगितले.

११ ऑगस्टपासून सर्व महाविद्यालये सुरू होतील

इयत्ता अकरावी प्रवेशाची दुसरी गुणवत्ता यादी उद्या (गुरुवारी) प्रसिद्ध केली जाणार आहे. दुसऱ्या गुणवत्ता यादीपूर्वी सुमारे पावणेसहा लाख विद्यार्थ्यांनी प्रवेशासाठी अर्ज केले असून त्यातील किती विद्यार्थ्यांना त्यांच्या पसंतीचे महाविद्यालय मिळेल हे २१ जुलैपर्यंत स्पष्ट होईल. ११ ऑगस्टपासून सर्वच महाविद्यालये नियमित सुरू होतील. आता ५० टक्के प्रवेश झालेल्या महाविद्यालयांना अकरावीचे वर्ग सुरू करण्यास परवानगी दिली आहे.

- डॉ. श्रीराम पानझडे, उपसंचालक, माध्यमिक व उच्च माध्यमिक, पुणे

अकरावी प्रवेशाची स्थिती

• प्रवेशासाठी नोंदणी

• १४.१० लाख

• आतापर्यंत प्रवेश

• ५,०७,२८८

• प्रवेशासाठी नव्याने अर्ज

• १.३० लाख

• दुसऱ्या यादीतील एकूण अर्ज

• ५.७६ लाख

सव्वातीन लाख विद्यार्थी प्रवेशापासून दूर

अकरावी प्रवेशाच्या ऑनलाइन नोंदणीवेळी राज्यभरातील १४ लाख १० हजार विद्यार्थ्यांनी सहभाग घेतला होता. त्यापैकी १० लाख ८३ हजार विद्यार्थ्यांनी प्रवेश अर्ज पूर्ण भरून सबमिट केला आहे. नोंदणी केलेल्यांपैकी तीन लाख २७ हजार विद्यार्थ्यांनी प्रवेश प्रक्रियेत पुन्हा सहभाग घेतलेला नाही. ते विद्यार्थी आयटीआय, पॉलिटेक्निकसाठी गेल्याचे अधिकारी सांगतात.