मुरगूड : दिल्ली येथे जगभरातून २९ देशांचे पंतप्रधान व राष्ट्रपती ‘जी - २०’ परिषदेसाठी आले आहेत. शनिवारी (ता. ९ ) व रविवारी (ता. १०) होणाऱ्या या बैठकीचे थेट प्रक्षेपण करण्याची जबाबदारी एका खासगी कंपनीवर असून त्या टीमचे प्रतिनिधित्व कागल तालुक्यातील कुरुकली या छोट्याशा खेडेगावातील प्रमोद बाळासो दाभोळे (Pramod Dabhole) हा मराठमोळा युवक करत आहे.

या परिषदेतील (G20 Summit India Delhi) प्रत्येक क्षणांचे प्रक्षेपण जगभरातील नागरिकांना घरबसल्या पाहता येणार आहे. पण, त्यासाठी बैठकीत प्रसार माध्यमांना परवानगी नाही. या बैठकीतील इत्यंभूत माहिती माध्यमांना देता यावी यासाठी एका खासगी कंपनीकडे हे लाईव्ह टेलिकास्टचे काम सोपवले आहे.

या नामांकित कंपनीची एक टीम हे सर्व काम पाहणार आहे. त्या टीमचे प्रतिनिधित्व प्रमोद करणार आहे. २१ जानेवारी २०२० मध्ये प्रमोदने विदेश मंत्रालयात व्हिडिओ एडिटर, ग्राफिक्स डिझायनर व टेक्निकल असिस्टंट म्हणून एका नामांकित कंपनीकडे काम सुरु केले. तिथे त्याने लाईव्ह ट्रिस्मिंगचे काम केले.

२०२० ते २०२२ या कालावधीत परराष्ट्र मंत्री एस.जयशंकर यांचे व्हिडिओ एडिटींग, लाईव्ह ट्रिस्मिंगचेही काम केले. डोनाल्ड ट्रम्प भारत दौऱ्यावर आले. त्यावेळीही प्रमोद यांची टीम त्यांच्यासोबत होती. आता ‘जी २० ’चे काम पाहण्यासाठी संबंधित कंपनीला दिल्लीला बोलवले. त्यामध्ये प्रमोद दाभोळे याची मीडिया कोऑर्डिनेटर (Media Coordinator) म्हणून निवड केली आहे.