तात्या लांडगे

सोलापूर : जागा मालकास काही रक्कम देऊन जागेची नोटरी केलेल्या सुमारे १५ हजारांहून अधिक जणांनी महापालिकेच्या टॅक्स विभागाकडे नोंद लावून घेतली आहे. मात्र, त्यातील अनेक जागा दुसऱ्यांनाच विकल्याने टॅक्स विभागाची डोकेदुखी वाढली आहे. या पार्श्वभूमीवर आता नोटरीवरून कोणाचीही नोंद न लावण्याचा निर्णय महापालिकेच्या कर आकारणी विभागाने घेतला आहे. अर्ज करणाऱ्यांच्या जागेवर जाऊन अधिकारी पाहणी करतील आणि तो व्यक्ती त्या जागे राहत असल्याची खात्री करूनच नोंद लावली जाणार आहे.

सोलापूर शहराच्या हद्दवाढ भागात आठ-दहा वर्षांपूर्वी तीन-चार लाखात मिळणाऱ्या एक गुंठे जागेची किंमत सध्या आठ ते १४ लाख रुपयांपर्यंत पोचली आहे. त्यामुळे सुरवातीला मूळ मालकाने चार-लाच लाखात विकलेला तोच प्लॉट दुसऱ्यालाच विकण्याचे प्रकार वाढले आहेत. त्यामुळे एकाच जागेची नोंद टॅक्स विभागाकडे लावण्यासाठी दोघे-तिघे येत होते. त्यातून वादविवाद वाढले होते आणि महापालिकेचा टॅक्स विभागासमोरील अडचणी देखील वाढल्या होत्या. त्यामुळे आता नोटरीवरून जागेची टॅक्स विभागाला लावण्याची पद्धत कायमची बंद करण्याचा निर्णय महापालिका आयुक्त सचिन ओंम्बासे यांनी घेतला आहे.

नोटरीवर यापूर्वी नोंद लावलेल्यांचे काय?

गुंठेवारीला परवानगी न मिळाल्याने, त्या जागेची मोजणी न झाल्याने अनेकजण लाखो रुपये देऊनही नोटरीवरच त्या जागांचे मालक आहेत. अशा अंदाजे १५ हजार जागेच्या नोंदी नोटरीवरून टॅक्स विभागाकडे यापूर्वी लावण्यात आल्या आहेत. त्या जागा भविष्यात दुसऱ्या व्यक्तींनाही विकल्या जाऊ शकतात. त्यामुळे संबंधित नोटरी मालकांबाबत महापालिकेने कोणताही निर्णय घेतलेला नाही.

नोटरीवरून टॅक्सला नाव लावण्याचे बंद, पण...

नोटरी करून कोणी त्या जागेची आमच्या नावे टॅक्स विभागाकडे नोंद लावावी, असा अर्ज केला तर तो मंजूर केला जाणार नाही. नोटरीवरून टॅक्स विभागाकडे नोंद लावण्याची पद्धत आता बंद करण्यात आली आहे. नोंदीपूर्वी अर्जदार व्यक्तीचा त्या जागेवर ताबा आहे का, तो सध्या त्याठिकाणी राहायला आहे का, या बाबी तपासल्या जातील.

- युवराज गाडेकर, कर संकलनप्रमुख, महापालिका, सोलापूर

नोटरीवरून नोंद लागणार, पण...

नोटरीवरून नोंद लावली जाणार आहे, पण तत्पूर्वी महापालिकेचे अधिकारी त्या जागेत जाऊन पहाणी करणार आहेत. तो अर्जदार त्या जागेत राहायला आहे का, त्याचे घर पक्के आहे की नोंद लावण्यापुरते तात्पुरते उभारण्यात आले आहे, याची खात्री महापालिकेचे अधिकारी करतील. त्या जागेचा कब्जा अर्जदाराकडे असल्याची खात्री झाल्यानंतर त्यांची नोंद टॅक्स विभागाकडे लागेल, असेही वरिष्ठ अधिकाऱ्यांनी सांगितले.