राज्यात सध्या उपमुख्यमंत्री देवेंद्र फडणवीस यांच्या लग्नाची जोरदार चर्चा रंगली आहे. विदर्भ वेगळा होत नाही तोपर्यंत लग्न करणार नाही अशी प्रतिज्ञा फडणवीस यांनी घेतली होती असा खुलासा राष्ट्रवादी नेते एकनाथ खडसे यांनी केला आहे. ( separate vidarbha issue Eknath khadse slams devendra fadnavis)

हिवाळी अधिवेशनात काल वेगळ्या विदर्भाचा मुद्दा चांगलाच गाजला. एकनाथ खडसे यांनी वेगळ्या विदर्भाच्या मुद्द्यावरून थेट उपमुख्यमंत्री फडणवीस यांना लग्नावरुनच टोला लगावला.

काय म्हणाले खडसे?

"देवेंद्र फडणवीस हे पाच वर्षे मुख्यमंत्री राहिले आहेत. आता ते उपमुख्यमंत्री आहेत. ते विर्दभातले आहेत. स्वतंत्र विर्दभासाठी ते आग्रही होते. विर्दभ वेगळा होत नाही तोपर्यंत लग्न करणार नाही, अशी भीष्म प्रतिज्ञा फडणवीस यांनी घेतली होती. मात्र त्यांचे लग्न झाले. मुलगी झाली. मुलगी आता मोठी झाली. त्यांचा सुखाचा संसार सुरु आहे," असा शब्दात खडसे यांनी फडणवीस यांची खिल्ली उडवली.

तसेच, राज्य सरकारने जवळपास तीस हजार कोटीचं कर्ज चार महिन्यांपूर्वी ठाणे आणि मुंबईसाठी घेतलं. मुंबईचा खर्च 45 हजार कोटीचा आहे. फक्त मुंबईच विकासासाठी महत्त्वाचा आहे का? महत्त्वाचा आहे. पण फक्त मुंबई -ठाण्यासाठी 45 हजार कोटी खर्च करता तर विदर्भासाठी किती खर्च करत आहात ते सांगा. अशी विचारणादेखील खडसे यांनी यावेळी केली.

वेगळ्या विदर्भाची पहिली मागणी केव्हा झाली?

विर्दभ वेगळा करावा, अशी मागणी अधिवेशनाच्या पहिल्याच दिवशी करण्यात आली. विदर्भ वेगळा करण्याची मागणी ही नागपूर करारानंतर करण्यात आली. परंतु ही मूळ मागणी मध्य प्रदेशमध्ये आणि विदर्भ हा सीपी अँन्ड बेरार राज्य अशी ओळख असलेल्या प्रदेशापासून आहे. त्यावेळी आठ जिल्हा असलेला भाग एका जिल्ह्यात रुपांतरीत झाला.

मात्र, ही मागणी १०० वर्षांपूर्वी झाली म्हटलं तरी वावगं ठरणार नाही. वेगळ्या विदर्भाची मागणी देश स्वातंत्र्याच्या आंदोलनाच्या काळात झाली. तेव्हापासून ही वेगळ्या विदर्भाची मागणी केली जात आहे.