ST Workers Protest : राष्ट्रवादी काँग्रेसचे अध्यक्ष शरद पवार (Sharad Pawar) यांच्या 'सिल्व्हर ओक' येथील निवासस्थानाबाहेर आज एसटी कर्मचाऱ्यांनी (ST Workers) अचानकपणे आंदोलन केलं. यावेळी एसटी कर्मचाऱ्यांनी 'सिल्व्हर ओक'च्या आवारात घुसखोरी करत आंदोलन केलं. एसटी महामंडळाचे विलीनीकरण पूर्णपणे करावे, या मागणीसाठी एसटी कर्मचाऱ्यांचा एक गट आज आक्रमक झाल्याचं दिसून आलं. आंदोलकांनी थेट शरद पवार यांच्या 'सिल्व्हर ओक' (Silver Oak) या निवासस्थानाच्या आवारात घुसून चप्पल फेक केली असल्याचा प्रकार समोर आलाय. आंदोलक एसटी कर्मचाऱ्यांनी थेट शरद पवार यांच्या निवासस्थानावर हल्लाबोल केल्यानं याचे गंभीर पडसाद उमटण्याची शक्यता आहे.

दरम्यान, शरद पवारांच्या घरीवरील या हल्ल्याचा गृहराज्यमंत्री शंभूराज देसाई (Shambhuraj Desai) यांनी निषेध नोंदवलाय. माध्यमांशी बोलताना देसाई म्हणाले, शरद पवार साहेबांच्या घराजवळ जाऊन ज्या एसटी कर्मचाऱ्यांनी आंदोलन केलंय, ते अतिशय चुकीचं आहे. आम्ही या आंदोलनाचा निषेध करतो, धिक्कार करतो, असा त्यांनी संताप व्यक्त केलाय.

ते पुढे म्हणाले, एसटी कर्मचाऱ्यांच्या संपाबाबत राज्य सरकारनं सकारात्मक भूमिका घेतलीय. जवळ-जवळ ४१ टक्क्यांपर्यंत पगार वाढ दिलीय. शिवाय, ९० टक्के मागण्या पूर्ण केल्या आहेत. मात्र, असं असताना पवार साहेबांच्या घराजवळ जाऊन आंदोलन करणं, हे पूर्णपणे चुकीचं आहे. एसटी कर्मचाऱ्यांच्या मागण्यांबाबत उच्च न्यायालयानं (Mumbai High Court) काल आपला निकाल जाहीर केला. याचं एसटी कर्मचाऱ्यांनी स्वागत केलं. हा विषय इथंच संपला असताना आज अचानकपणे जाऊन आंदोलन करणं, हे कितपत योग्य आहे? बेसावध असताना खालच्या थराला जाऊन एसटी कर्मचाऱ्यांनी आंदोलन केलंय. मात्र, आम्ही कोणतीही बघ्याची भूमिका घेणार नाहीय. याबाबत पोलिस खात्याला सक्त आदेश दिले असून योग्य ती कारवाई केली जाईल, असा इशारा त्यांनी दिलाय.