कऱ्हाड : ज्येष्ठ नेते शरद पवार यांना गेल्या अनेक वर्षांपासून मी ओळखतो. त्यांचे राजकारणही बघतो. त्यांचे आमचे वैचारिक मतभेद आहेत. मात्र, एवढ्या दीर्घ काळात त्यांनी कधीही जातीयवादी भूमिका घेतलेली नाही. त्यामुळे ते जातीवादी नाहीत, असे स्पष्टीकरण स्वाभिमानी शेतकरी संघटनेचे संस्थापक राजू शेट्टी यांनी आज येथे दिले. बळिराजा उद्धार यात्रेनिमित्त शेट्टी कऱ्हाडला आले होते. त्याचदरम्यान त्यांनी पत्रकारांशी संवाद साधला. शेट्टी म्हणाले, ‘‘ज्येष्ठ नेते यशवंतराव चव्हाण यांच्या जन्मगाव देवराष्ट्रेपासून बळिराजा उद्धार यात्रा सुरू झाली आहे.

एक मे रोजी होणाऱ्या ग्रामसभेत शेतीला दिवसा दहा तास वीज मिळावी, शेतकऱ्यांना हमीभावाचा गॅरंटी कायदा केंद्र सरकारने मंजूर करावा हे दोन ठराव करण्यात येणार आहेत. ते ठराव घेऊन आम्ही उच्च न्यायालयात दाद मागणार आहोत. त्याचबरोबर आम्ही हे ठराव राष्ट्रपतींना देणार आहोत.

म्हणून वाजताहेत राजकीय भोंगे...

महागाईवर नियंत्रण आणण्यात केंद्र सरकार, तर शेतकऱ्यांच्या प्रश्नावर राज्य सरकार अपयशी ठरले आहे. दोन वर्षांत महापूर, कोरोनासह अनेक आपत्ती आल्या. त्यामध्ये पीक विमा योजना राबविणाऱ्या कंपन्या कर्जबाजारी होऊन दिवाळखोरीत निघाल्या पाहिजे होत्या. मात्र, त्याच कंपन्या हजारो कोटी रुपयांचा नफा कमविला आहे. त्यांनी शेतकऱ्यांना फसवले आहे. केंद्र सरकार, राज्य सरकारचे अपयश यावर चर्चा नको म्हणून हे राजकीय भोंगे वाजत आहेत, असेही शेट्टी यांनी सांगितले.