मुंबई : राज ठाकरेंनी शरद पवारांवर गंभीर आरोप केले होते. शरद पवार छत्रपती शिवाजी महाराजांचे नाव घेत नाही, असं राज ठाकरे म्हणाले होते. त्यालाच आता पवारांनी प्रत्युत्तर (Sharad Pawar Replied Raj Thackeray Allegations) दिले आहे. मी महाराजांबद्दल काय काय बोललोय? हे ऐकावं. ते वृत्तपत्रात वाचावं. पण, त्यासाठी सकाळी लवकर झोपेतून उठावं लागतंय, असा टोला पवारांनी राज ठाकरेंना लगावला.

एखादी व्यक्ती सहा महिन्यात मत व्यक्त करते ते गांभीर्यानं घेण्यासारखं नाही. मी छत्रपती शिवाजी महाराजांचं नाव घेत नाही, असा उल्लेख राज ठाकरेंनी केला. दोन दिवसांपूर्वी मी अमरावतीला होतो. तुमचे कोणी सहकारी असतील तर त्यांच्याकडून माझं शिवाजी महाराजांच्या योगदानावर केलेलं भाषण मागवून घ्या. मला सकाळी उठल्यानंतर वृत्तपत्र वाचायची सवय आहे. त्यासाठी सकाळी लवकर उठावं लागतं. अनेकजण वृत्तपत्रात काय लिहिलंय हे न वाचता वक्तव्य करत असेल तर मी त्यांना दोष देणार नाही, असा टोला शरद पवारांनी राज ठाकरेंना लगावला.

महात्मा फुलेंनी शिवछत्रपतींबाबत काव्यांच्या माध्यमातून पहिल्यांदा लिहिलंय. शाहू-फुले-आंबेडकर तिघेही महाराजारांच्या विचारावर चालतात. म्हणून मला या तिघांचा उल्लेख करणे म्हणजे छत्रपतींच्या विचारांची मांडणी कऱण्यासारखे महत्वाचे वाटते. मी शिवाजी महाराजांचे नाव घेत नाही, हा आरोप खोटा आहे. कालच्या भाषणात सर्वसामान्यांचा एकही प्रश्न नाही. राष्ट्रवादीमध्ये विविध जातीच्या लोक आहेत. महाराष्ट्रात जातीय तेढ निर्माण करण्याचा प्रयत्न केला जातोय. पण, लोकांनी त्याकडे लक्ष देऊ नये, असंही पवार म्हणाले.