Sharad Pawar : राष्ट्रवादी काँग्रेस पक्षाचे संस्थापक अध्यक्ष शरद पवार हे आज जळगाव जिल्हा दौऱ्यावर आहेत. ते जळगाव जिल्ह्यात सभा घेणार आहेत. त्याआधी त्यांनी पत्रकार परिषदेचे आयोजन केले असून शरद पवार पत्रकारांशी संवाद साधणार आहेत.

जळगाव शहरातील सागर पार्कवर जाहीर सभा घेतली जाणार आहे. दुपारी दीड वाजता सभेला सुरुवात होणार आहे. त्यानंतर ते सायंकाळी महापौर जयश्री महाजन (ठाकरे गट) यांच्या निवास्थानी जाऊन भेट घेणार आहेत.

राष्ट्रवादीत पडलेल्या फुटी नंतर जळगाव जिल्ह्यात ही शरद पवारांची पहिलीच सभा आहे. या सभेसाठी जय्यत तयारी करण्यात आली असून सुमारे 30 हजार नागरीक या ठिकाणी उपस्थित राहतील असा दावा राष्ट्रवादी काँग्रेस पक्षातर्फे करण्यात आला आहे. जिल्हा राष्ट्रवादी कडून राज्यातील आतापर्यंतची ही सर्वात मोठी सभा व्हावी यासाठी जय्यत तयारी करण्यात आली आहे.

जळगाव जिल्ह्यात राष्ट्रवादीचे एकमेव आमदार आहेत. जे आता अजित पवार गटात असून सध्या राज्याचे मंत्री आहेत. मंत्री अनिल पाटील यांच्यावर शरद पवार या सभेमध्ये नक्की काय म्हणतात? मंत्री अनिल पाटील यांच्यावर शरद पवार टीकास्त्र सोडतात का? याचबरोबर जळगाव जिल्ह्यात आपल्या गटाला संजीवनी देण्यासाठी नक्की शरद पवार काय भूमिका मांडतात याकडे संपूर्ण जिल्ह्याचे लक्ष लागले आहे.

याचबरोबर जळगाव जिल्ह्यातील अकरा आमदारांपैकी नऊ आमदार हे शिवसेना आणि भारतीय जनता पक्षाकडे आहेत. तर गिरीश महाजन व गुलाबराव पाटील हे राज्याचे मंत्री आहेत. यामुळे शरद पवार यांच्यावरही निशाणा साधतात का? हे पाहणं अतिशय उत्सुकतेच बनलं आहे.(Latest Marathi News)