Sharad Pawar Resigns: राष्ट्रवादी कॉंग्रेस पक्षाचे अध्यक्ष शरद पवार यांच्या अचानक निवृत्तीच्या घोषणेने राज्यातीलच नव्हे तर देशभरातील पक्षाच्या नेत्यांना धक्का बसला असून, याची प्रचिती आज आली. केरळमधील राष्ट्रवादी कॉंग्रेसचे नेते पी. सी. चाको यांनी राष्ट्रवादी कॉंग्रेसचे नेते प्रफुल्ल पटेल यांना तुम्ही पक्षात आघाडीचे नेते असताना शरद पवार यांच्या निवृत्त होण्याच्या घोषणेची कल्पना कशी नव्हती, असा प्रश्‍न विचारला.

केरळचे पी. सी. चाको आज मुंबईच्या यशवंतराव चव्हाण प्रतिष्ठानमध्ये आले. शरद पवार यांच्या भेटीनंतर तेथे उपस्थित असलेले खासदार प्रफुल्ल पटेल यांना ते म्हणाले की, ‘‘प्रफुल्लजी तुम्ही तर पक्षात क्रमांक दोनचे नेते आहात. तरी तुम्हाला या निर्णयाबद्दल काहीच माहिती कसे नाही?’’ यावर पटेल यांनी आम्हा कुणालाही याबाबतची कल्पना नव्हती, अशी कबुली दिली.

पी.सी.चाको यांच्या पचनी पटेलांचे उत्तर पडले नाही. हे असे कसे झाले ? असा सवाल करत हा निर्णय होत असताना किमान पटेल तुम्ही तरी सांगायला हवे होते, अशा शब्दांत अपेक्षा व्यक्त केली. त्यांच्या या भावनेवर पटेल देखील निरुत्तर झाल्याचे चित्र होते. पी. सी. चाको हे केरळमधील राष्ट्रवादी कॉंग्रेसचे नेते आहेत.

त्यांनी काँग्रेस पक्षामधून राष्ट्रवादी कॉंग्रेसमध्ये प्रवेश करण्याच्या वेळी ते काँग्रेस वर्किंग कमिटी (सीडब्लूसी) या पक्षांतर्गत सर्वोच्च समितीचे सदस्य होते. सध्या केरळमध्ये राष्ट्रवादी कॉंग्रेसचे चार आमदार असून तेथील सरकारमध्ये राष्ट्रवादी कॉंग्रेस सहभागी आहे.