राज्यातील अनेक नाट्यमय घडामोडीनंतर आणि सत्तासंघर्षानंतर राज्याच्या राजकारणाला वेगळंचं वळण आलं असल्याचं पहायला मिळालं आहे. तीनवेळा सरकार आलं, मुख्यमंत्री शपथ झाली, तरी देखील राज्यातील अस्थिरता कायम असल्याचं दिसून येतं आहे. त्यामुळे आता या संपुर्ण घडामोडीवर कायमचा तोडगा निघावा, अशी अपेक्षा केली जात आहे. याच दरम्यान केंद्रीय मंत्र्याने थेट राष्ट्रवादीचे सर्वेसर्वा शरद पवार यांना एनडीएसोबत येण्याची ऑफर दिली आहे.

नागालँडप्रमाणे देशाच्या विकासासाठी शरद पवार यांनी एनडीए सोबत येण्याचं आवाहन केंद्रीय मंत्री रामदास आठवलेंनी केलं आहे. शरद पवार आणि नरेंद्र मोदी यांचे चांगले संबंध आहेत. मोदींकडून शरद पवार यांचं अनेक वेळा कौतूक झालं आहे, असं रामदार आठवले म्हणाले आहेत. शरद पवारांनी आता एनडीए सोबत यावं, अशी खुली ऑफर रामदास आठवलेंनी शरद पवारांना दिली आहे.

तर पुढे बोलताना रामदास आठवले यांनी मनसे अध्यक्ष राज ठाकरेंना लक्ष केलं आहे. बोलताना म्हणाले की, राज ठाकरे हे गर्दी जमवण्यात एक्स्पर्ट आहेत. राज ठाकरेंनी भोंग्यांचा मुद्दा वाढवू नये, भोंगे काढण्यापेक्षा मंदिरावर भोंगे कश्या लावता येतील ते बघावं, भोंग्याना विरोध करू नये. राज ठाकरे यांनी चांगलं काम करून आपला पक्ष वाढवावा, असा सल्ला देखील रामदास आठवले यांनी यावेळी दिला आहे.

तर बाळासाहेब ठाकरे असते तर उध्दव ठाकरे यांच्यावर ही वेळ आली नसती. शिवसेना घालवण्यात उद्धव ठाकरे आणि संजय राऊत हे जबाबदार असल्याचं देखील वक्तव्य रामदास आठवले यांनी केलं आहे.

‘काँग्रेस आता खिळखिळी झाली आहे. त्यांचे नेते भाजपमध्ये येत आहेत. माझ्या पक्षाला नागालँडमध्ये मान्यता मिळाली. त्यावेळी राष्ट्रवादी कॉंग्रेसने साथ दिली. पंतप्रधान नरेंद्र मोदी व ज्येष्ठ नेते शरद पवार यांचे चांगले संबंध आहेत. त्यांनी आता ‘एनडीए’ला साथ द्यायला हवी’ असंही आठवले म्हणालेत.