मुंबई - सध्या संपूर्ण देशाचं लक्ष राष्ट्रपतीपदाच्या निवडणुकीकडे लागलं आहे. राष्ट्रपतीपदासाठी १८ जुलैला मतदान तर २१ जुलै रोजी मतमोजणी होणार आहे. यावेळी प्रथमच राष्ट्रपतीपदासाठीच्या निवडणुकीत एक आदिवासी महिला उमेदनार असून त्या एनडीएच्या उमेदवार आहेत. द्रौपदी मुर्मू यांना भाजपने उमेदवारी दिली असून देशभरातील अनेक पक्ष त्यांना पाठिंबा दर्शवित आहे. महाराष्ट्रात भाजपच्या विरोधात असलेल्या शिवसेनेने देखील त्यांना पाठिंबा दर्शविला आहे. त्यातच राष्ट्रवादी काँग्रेसने देखील त्यांना पाठिंबा देण्याची मागणी झाली आहे. (Navneet Rana news in Marathi)

राष्ट्रवादी काँग्रेसने देखील द्रौपदी मुर्मू यांना पाठिंबा द्यावा अशी मागणी अमरावतीच्या खासदार नवनीत राणा यांनी शरद पवार यांच्याकडे केली आहे. नवनीत राणा यांनी म्हटलं की, शरद पवार महाराष्ट्रातील दिग्गज नेते आहेत. आदिवासींना आता सर्वांच्या पाठिंब्याची गरज आहे. प्रथमच आदिवासींमधून एक महिला राष्ट्रपतीपदापर्यंत पोहचल्या आहे. त्या भाजपच्या आणि पंतप्रधान नरेंद्र मोदींनी दिलेल्या उमेदवार आहेत असा विचार न करता त्यांना पाठिंबा द्यावा. त्यांचा खडतर प्रवास लक्षात घ्यायला हवा असही राणा यांनी म्हटलं.

दरम्यान मुर्मू यांचे परिश्रम पाहून आणि आदिवासी समाजाला सर्वांच्या पाठिंब्याची गरज असल्यामुळे मी स्वत: शरद पवार यांना विनंती करते की, त्यांनी द्रौपदी मुर्मू यांना राष्ट्रपतीपदाच्या निवडणुकीत पाठिंबा द्यावा, असंही नवनीत राणा यांनी म्हटलं.

राष्ट्रपती पदाच्या निवडणुकीत एनडीएच्या उमेदवार मुर्मू यांना यशवंत सिन्हा यांचं आव्हान आहे. याआधीच अनेक प्रादेशिक पक्षांनी मुर्मू यांना पाठिंबा दर्शविला आहे. त्यामुळे निवडणुकीत मुर्मू यांचं पारड जड दिसत आहे.