मुंबई - राष्ट्रवादी काँग्रेसचे प्रमुख शरद पवार यांच्या भूमिकेवर अनेक प्रश्नचिन्ह उपस्थित करण्यात येत होते. त्यामुळे विरोधकांच्या आघाडीत चलबिचल सुरू झाली होती. मात्र आज शरद पवार यांनी पत्रकार परिषद घेऊन आपली भूमिका स्पष्ट केली. यावेळी त्यांनी भाजपवर जोरदार टीका केली.

शरद पवार म्हणाले की, भाजपकडून समाजात तेढ निर्माण कऱण्याचा प्रयत्न करण्यात येतोय. हा मुद्दा आमच्या इंडिया आघाडीच्या बैठकीत उपस्थित करण्यात येईल. यावेळी त्यांनी पुतण्या अजित पवार यांच्यासोबत झालेल्या बैठकीवरही भाष्य केलं.

शरद पवारांना कृषीमंत्रीपद आणि सुप्रिया सुळेंना केंद्रात मंत्रीपद आणि इतर काही ऑफर अजित पवारांद्वारे देण्यात आल्याचा दावा माजी मुख्यमंत्री पृथ्वीराज चव्हाण यांनी केला होता. त्यावर शरद पवार यांनी भूमिका स्पष्ट केली. ते म्हणाले की, कोणी काय विधान केलं ते मला माहित नाही. आमच्या गुप्त बैठकीत अशी कोणतीही चर्चा झाली नाही. भेट झाली होती. पवार कुटुंबाचा प्रमुख म्हणून माझा सल्ला घेण्याची पद्धत आमच्या परिवारात आहे. त्यातून गैरसमज करून घेण्याचं कारण नाही, असंही पवार म्हणाले.

दरम्यान तुमच्या भेटीमुळे काँग्रेस आणि शिवसेना वेगळा फॉर्म्युला तयार करण्याच्या प्रयत्नात आहेत. त्यावर पवार म्हणाले की, या केवळ चर्चा आहे. ही वस्तूस्थिती नाही. तुम्ही संजय राऊत यांचं निवेदन पाहिलं असेल. त्यात त्यांनीही सांगितलं की, या सगळ्या बाबी असत्यावर आधारित आहेत.