मुंबई - राष्ट्रवादी काँग्रेसमधील बंडानंतर दोन्ही गटाकडून सावध प्रतिक्रिया देण्यात येत होत्या. मात्र कोल्हापूरमधील सभेत शरद पवार गटाने अजित पवार गटावर कठोर शब्दांत हल्ला केला. यामध्ये जितेंद्र आव्हाड यांनी कठोर शब्दात अजित पवार गटाला पहिल्यांदा गद्दार म्हटलं. या टीकेवरून ठाकरे गटाचे खासदार संजय राऊत यांनी समाधान व्यक्त केलं आहे.

संजय राऊत म्हणाले की, मला राष्ट्रवादी काँग्रेस पक्षाच्या अंतर्गत वादात पडायचं नाही. मात्र शरद पवार आणि त्यांच्या सहकार्‍यांनी कोल्हापुरात जी सभा घेतली आणि बेईमानांवर हल्ला केला तो जबरदस्त होता. मी त्याला त्याला महत्त्व देतो.

अजित पवार हे कोणाचे नेते आहेत हे माहित नाही. अजित पवारांना सध्या अमित शहा आणि देवेंद्र फडणवीस यांचं नेतृत्व मानावं लागत आहे. मात्र शरद पवार हे भारतीय जनता पार्टी बरोबर कधीच जाणार नाही. महाराष्ट्र ही युद्धांची भूमी आहे. इथं मैदानावरचं आणि गनिमी काव्याने अशी दोन प्रकारे युद्ध लढली गेली आहेत.

आम्ही मैदानात उतरून युद्ध करत आहोत. शरद पवारांनी वेगळा मार्ग स्वीकारला, तो म्हणजे गनिमी काव्याचा. शरद पवार त्यांच्या पक्षातील लोकांशी गनिमी काव्याने लढत आहेत. तर आम्ही शस्त्र वापरून हे युद्ध लढत आहोत दोन्ही युद्धात आम्हाला यश येईल, असं संजय राऊत यांनी म्हटलं.

जितेंद्र आव्हाड यांनी कोल्हापूरच्या सभेत अजित पवार गटाच्या नेत्यांवर जोरदार टीका केली होती. आव्हाड यांनी अजित पवार गटाच्या नेत्यांना थेट गद्दार म्हटलं होतं. गद्दारी काही लोकांच्या रक्तातच असते, ते आता महाराष्ट्राला दिसत आहे. जे साप बिळात होते, ते बाहेर पडले आहेत. या सापांना चेचण्यासाठी आपल्याला पायतानाचा वापर करावा लागेल. कोल्हापुरात पायतान प्रसिद्घ आहे. त्याचा उपयोग महाराष्ट्राने करावा, असा सल्ला आव्हाडांनी दिला होता.