राज ठाकरेंनी मशिदीवरील भोंगे काढण्याबाबत दिलेल्या अल्टीमेटमवर राष्ट्रवादी पक्षाचे अध्यक्ष शरद पवार यांनी भाष्य केले. मुंबईतील पत्रकार परिषदेत पत्रकारांनी विचारलेल्या प्रश्नाला उत्तर देताना शरद पवार म्हणाले की, राज ठाकरेच्या या वक्तव्याचा राज्य सरकार गांभीर्याने विचार करेल.

"महागाई, विकास इ. प्रश्नावरून लक्ष भरकटवण्यासाठी देशात धार्मिक तेढ निर्माण केली जात आहे. देशात सामाजिक ऐक्याला धक्का देण्याचा प्रयत्न सुरु आहे. सांप्रदायिक विचाराला प्रोत्साहन देण्याचं चित्र सध्या दिसत आहे. लोकांनी याला बळी पडू नये', असंही शरद पवार पत्रकारांशी बोलताना म्हणाले. (Sharad Pawar's comment on Raj Thackeray's ultimatum)

राज ठाकरे गुढीपाडवा मेळाव्यादिवशी मशिदींवरील भोंग्याविरोधात घेतलेल्या भूमिकेवर ठाम आहेत. मशिदीवरील भोंगा हा धार्मिक नसून सामाजिक प्रश्न आहे. त्यामुळे या मुद्द्यावरून मागे हटणार नसल्याची भूमिका राज ठाकरेंनी घेतली. या विषयावर बोलताना काल राज ठाकरे म्हणाले होते की, "मशिदिवरचे भोंगे काढा हे मी आधिच सांगितंल होतं. याचा देशाला त्रास होतोय. हा धार्मिक विषय कुठं आहे, प्रार्थना तुमची आहे आम्हाला कशाला ऐकवताय. तुम्हाला सांगून जर कळत नसेल की आम्हाला त्रास देऊ नका, तर तुमच्या मशिदी बाहेर हनुमान चालिसा लावणार म्हणजे लावणार. देशातील आणि राज्यातील मशिदींवरील सर्व भोंगे ३ मे पर्यंत उतरवा, आम्ही आमची भूमिका मागे घेणार नाही." असे म्हणत त्यांनी राज्य सरकारला अल्टिमेटम दिला आहे.

दरम्यान आज मुंबई येथे पत्रकार परिषदेत राज ठाकरेंच्या या अल्टीमेटमवरील प्रश्नाला उत्तर देताना राज्य सरकार याबाबत गांभीर्याने विचार करेल, असं शरद पवार म्हणाले.