राज्याच्या राजकारणात खळबळ माजवणारी घटना काही महिन्यांपूर्वी घडली. शिवसेनेतून एकनाथ शिंदे आणि समर्थक आमदार यांनी बंड केलं आणि सत्तेतून बाहेर पडले. त्यानंतर शिंदे आणि समर्थक आमदार यांनी भाजपसोबत युती करत सरकार स्थापन केलं. त्यानंतर राज्याच्या राजकारणात वेगळ्या घटना घडू लागल्या. अशातच वंचित बहुजन ठाकरे यांच्यासोबत येण्याची शक्यता वर्तवण्यात आली.

दरम्यान, ठाकरे गटाचे प्रमुख उद्धव ठाकरे आणि वंचित बहुजन आघाडीचे नेते प्रकाश आंबेडकर दोन दिवसांपूर्वी एकाच मंचावर आले होते. यावेळी दोन्ही नेत्यांनी एकत्र येण्याचे संकेतही दिलेत. त्यामुळे राज्यातील राजकारण आणखी कोणते वळण घेत ही पाहणं महत्वाचं ठरणार आहे. एकीकडे आंबेडकर-ठाकरे युतीची चर्चा सुरू असतानाच दुसरीकडे शिंदे गटाच्या हालचाली दिसू लागल्या आहेत. शिंदे गट आणि दलित पँथरची युती होण्याची शक्यता आता वर्तवली जात आहे. ही युती होईल की नाही याकडे सर्वांचं लक्ष लागलं आहे.

दोन दिवसानंतर म्हणजेच 25 नोव्हेंबरला कराडमध्ये दलित पँथरच्या राज्यकार्यकारिणीची बैठक होणार आहे. या बैठकीत शिंदे गटासोबत युती करण्यावर शिक्कामोर्तब करण्यात येणार आहे. त्यानंतर एक शिष्टमंडळ शिंदे गटाला भेटून युतीचा प्रस्ताव देणार असल्याचं सांगितलं जातय. ठाकरे- आंबेडकर युतीला शह देण्यासाठीच शिंदे गटाकडून ही खेळी खेळण्यात येत असल्याचं बोललं जात आहे.

हे ही वाचा: Elon Musk Takeover Twitter : ट्विटरची टिवटिव थांबणार का?