मुंबई- शिवसेना आमदार अपात्रता प्रकरणी आजची सुनावणी संपली आहे. सोमवारी पुन्हा याप्रकरणी सुनावणी सुरु होईल. सुनावणीनंतर शिंदे आणि ठाकरे गटाच्या नेत्यांनी माध्यमांशी संवाद साधला. यावेळी ठाकरे गटाचे प्रतोद सुनिल प्रभू म्हणाले की, राहुल शेवाळे जेवढं खोटं बोलतील, तितकं चांगलं आहे कारण ते जितकं खोटं बोलतील ते तितकं अडचणीत येतील.

राहुल शेवाळे म्हणाले की पक्षाच्या घटनेमध्ये दुरुस्ती करुन मुख्य नेता पद निर्माण केले आहे. शेवाळेंचे वकील ज्या पीटिशनचा उल्लेख केला ती १९९९ ची घटना आहे. पण, १९९९ साली मुख्य नेता पद होतं का? मग ते मुख्य नेते पद कसं निवडू शकतात. त्यांना अधिकार नाही. जे काही आहे ते खोटं आहे. खोटं बोल पण रेटून बोलं असं त्याचं वर्तन आहे. पण, शेवटी सत्याचा विजय होईल असा माझा विश्वास आहे, असं प्रभू म्हणाले.

बाळासाहेब ठाकरे, उद्धव ठाकरे आणि शिवसेना यांचे आणि मुंबईचे असणारे नाते अतूट आहे. ते कधीही तुटणार नाही. मुंबईकरांना पूर्ण विश्वास उद्धव बाळासाहेब ठाकरे यांच्यावर आहे. त्यांनी करुन दाखवलेली कामे लोकांसमोर आहेत. त्यामुळे मुंबई महापालिकेमध्ये पुन्हा एकदा आमचीच सत्ता येईल, असंही प्रभू म्हणाले.

सरकार आल्यापासून भ्रष्टाचाराचे शिखर गाठले आहे. येत्या काळात हे बाहेर येईल, असंही ते म्हणाले. नवाब मलिकांबाबत प्रभू म्हणाले की, मेडिकल लिव्हवर नवाब मलिक हे बाहेर आहेत. विधानसभेत येऊन त्यांना मस्टरवर स्वाक्षरी करावी लागते. त्यामुळे ते आले असतील. त्यांनी मेडिकल सर्टिफिकेट दिले आहे. मेडिकल लिव्हवरच ते बाहेर आहेत.

विधानसभेचे अध्यक्ष राहुल नार्वेकर यांच्या समोर आमदार अपात्रता प्रकरणी सुनावणी सुरु आहे. यावेळी दोन्ही गटाचे नेते तेच-तेच मुद्दे उपस्थित करत असल्याने अध्यक्ष चिडल्याचं पाहायला मिळालं. मंगळवारपर्यंत सर्व युक्तीवाद पूर्ण करण्याच्या सूचना अध्यक्षांनी ठाकरे आणि शिंदे गटाला दिल्या असल्याची माहिती आहे.(Latest Marathi News)