मुंबई : भाजप-शिवसेना यांच्यातील युतीचे अखेर ठरल्यात जमा असून, 120 पेक्षा एकही जास्त जागा देणार नाही असे सांगणाऱ्या भाजपने अखेर 126 चा आकडा देवू यात असे केंद्राला कळवले आहे.

सेनेने भाजपकडे 135 जागांची मागणी अखेरपर्यंत लावून धरली होती. समसमान वाटप हा मुद्दा न सोडल्याने अखेर 126 जागा देण्याचा प्रस्ताव भाजपने दिल्लीला पाठवला आहे. काही जागांवर भाजपने त्यांचे उमेदवार देण्याचा प्रस्ताव सेनेसमोर ठेवला आहे.

परस्परांना समवेत घेऊन पुढे जाण्याचे भाजप-शिवसेनेने पुन्हा एकदा मान्य केले आहे. परंतु नवी मुंबई, वर्धा, नाशिक आणि पुणे या जिल्ह्यांत आम्हाला अस्तित्व टिकविण्यासाठी जागा द्या, या शिवसेनेच्या आग्रहामुळे भाजप जेरीस आली आहे. शिवसेनेला 126 जागा देत भाजपने 146 जागा लढण्याचे जवळपास निश्‍चित झाले आहे. दिल्लीतून राष्ट्रीय अध्यक्ष अमित शहा यांनी मुख्यमंत्री देवेंद्र फडणवीस आणि महाराष्ट्राचे प्रदेशाध्यक्ष चंद्रकांत पाटील यांनी शिवसेनेशी एकेका वादाच्या जागेवर चर्चा सुरू ठेवली होती.