आगामी निवडणुकीत एकही नेता शिवसेनेत नसेल, तर शिवसेनेतील सगळे नेते शिंदेगटात येतील, असं बावनकुळे म्हणाले होते. त्यालाच उत्तर देताना शिवसेना नेत्या आणि मुंबईच्या माजी महापौर किशोरी पेडणेकरांनी बावणकुळे यांना लक्ष्य केलं आहे. नुसतं बावनकुळे आडनाव असून चालत नाही, तर डोक्यात पण काहीतरी असावं लागतं, अश्या कठोर शब्दात किशोरी पेडणेकर यांनी भाजपचे प्रदेशाध्यक्ष चंद्रशेखर बावनकुळे यांच्यावर हल्लाबोल केला आहे. शिंदेगट आणि शिवसैनिकांमध्ये झालेल्या वादा प्रकरणी न्याय मागण्यासाठी पोलिसांकडे जाणार असल्याचं पेडणेकर म्हणाल्या आहेत.

आगामी निवडणुकीत भाजप आणि शिवसेनेची युती होईल. एकही नेता शिवसेनेत नसेल, तर शिवसेनेतील सगळे नेते शिंदेगटात येतील. मुख्यमंत्री एकनाथ शिंदे यांच्या नेतृत्वात शिवसेना आणि भाजप एकत्र निवडणुक लढेल. याआधी मिळाले नसेल त्यापेक्षा जास्त यश या सरकारला प्राप्त होईल, असं वक्तव्य भाजप प्रदेशाध्यक्ष चंद्रशेखर बावनकुळे यांनी केलं होतं.

त्याचबरोबर पत्रकारांच्या प्रश्नाला उत्तर देताना किशोरी पेडणेकर म्हणाल्या की, आम्हाला मुख्यमंत्री एकनाथ शिंदे साहेबांचा बराच वेळेला अनुभव आहे. खरंच ते शब्द पाळणारे होते. पण आता 236 वाढ करणारे तुम्हीच आणि आता यांच्या नादाला लागून ज्यांच्या बरोबर मांडीला मांडी लावत आहे ते 227 करत आहेत. मग शब्द कोण फिरवतोय. आम्ही मानतो तुम्ही शब्द पाळणारे एकदम कट्टर शिवसैनिक होता पण आज तुम्ही फक्त म्हणायला शिवसैनिक आहात. 236 चे 227 करायला भाग पाडणारे आणि शब्द फिरवणारे अशी तुमची इमेज म्हणते ती मला वाटतं फार घातक आहे असे मत किशोरी पेडणेकर यांनी व्यक्त केले आहे.