खासदार संजय राऊत यांचं वादग्रस्त विधान आज दिवसभर चर्चेचा विषय ठरला आहे. राज्यातलं विधिमंडळ हे चोरमंडळ आहे, असं विधान राऊतांनी केलं आणि अर्थसंकल्पीय अधिवेशनात गदारोळ माजला, राऊतांवर हक्कभंग प्रस्ताव आणला आणि विधिमंडळाचं आजचं कामकाज तहकूब झालं.

दरम्यान, शिवसेनेने आमदार संतोष बांगर यांनी संजय राऊतांवर टीका केली आहे. तसंच त्यांना शिवीगाळही केली आहे.

सभागृहातलं कामकाज तहकूब झाल्यानंतर भाजपा आणि शिंदे गटाच्या सदस्यांनी विधानभवन परिसरात घोषणाबाजीही केली. शिवसेनेचे आमदार संतोष बांगर यांनी संजय राऊत हा डाकू आहे, त्याच्यावर गुन्हा दाखल करा, अशी मागणी केली. तसंच त्यानंतर संजय राऊत यांना शिवीगाळ केली.

बांगर म्हणाले, "संजय राऊत आमच्या मतांवर निवडून येतो आणि आम्हालाच चोर म्हणतो. मला वाटतं हा संजय राऊत डाकू आहे. त्याच्यावर ३९५ कलमांतर्गत गुन्हा दाखल करावा. संजय राऊत आम्हाला ज्या पद्धतीने चोर म्हणतायत. मग उद्धव ठाकरे आणि आदित्य ठाकरेंनाही त्यांनी चोर म्हटलं आहे. अशा ह***** महाराष्ट्रातली जनता फिरू देणार नाही."