मुंबई - ज्येष्ठ नेते एकनाथ शिंदे यांनी शिवसेनेतून बंड केल्यामुळे संपूर्ण शिवसेना अडचणीत आली आहे. आमदारांपाठोपाठ खासदार देखील शिंदे गटात गेल्याने शिवसेनेच्या अस्तित्वाचा प्रश्न निर्माण झाला. यातून मार्ग काढत उद्धव ठाकरे ऍक्शन मोडमध्ये आले आहेत. आज ते पदाधिकाऱी मेळाव्यात शिवसेनेच्या पदाधिकाऱ्यांना संबोधित करणार आहेत. मात्र त्याआधी शिवसेना नेते भास्कर जाधव यांनी भाजपवर कडाडून टीका केली.

भास्कर जाधव म्हणाले की, शिवसेनेला मुंबईच्या विकासासाठी मुंबई महापालिकेची सत्ता हवी आहे. काही दिवसांपूर्वी भाजपचं केंद्रीय नेतृत्व मुंबईत आलं होतं. त्यांनी मुंबईत म्हटलं देखील मुंबई काबीज करण्याचं आमचं फार-फार जुनं स्वप्न आहे, असं म्हणत भास्कर जाधव यांनी संयुक्त महाराष्ट्राचा लढा उपस्थितांना आठवण करून दिला.

भास्कर जाधव यांनी उद्धव ठाकरे यांच्या नेतृत्वाच कौतुक केलं आहे. १९९२ ची दंगल झाली. त्यावेळी शिवसेनेने मुंबई वाचवली. उध्दव ठाकरे यांच्याविषयी सर्व धर्मांमध्ये आदर आहे. ४० गद्दारांनी उद्धव ठाकरे आजारी असताना त्यांच्या पाठीत खंजीर खुपसला. उलट आजारी असताना गद्दारांनी उद्धव साहेबांच्या मागे ताकदीने उभं राहायला पाहिजे होतं, असंही भास्कर जाधव म्हणाले.

भाजपवाले म्हणतात, शिवसेनेने नरेंद्र मोदींचा फोटो वापरून मतं मागितले. पण तुम्ही सुरुवातीपासून बाळासाहेबांचा फोटो वापरला हे कधी सांगणार, असा सवाल जाधव यांनी केला. तसेच आता देखील गद्दारांच्या बॅनरवर बाळासाहेबांचा फोटो दिसतो, पण शिवसेनेच्या कोणत्याही बॅनरवर नरेंद्र मोदींची फोटो नाही, असं जाधव यांनी म्हटलं.