मुंबई: राज्याचा कारभार जिथून चालवला जातो, त्या मंत्रालयात (mantralaya) एक धक्कादायक बाब समोर आली आहे. मंत्रालयातील उपहारगृह परिसरामध्ये (canteen area) मोठ्या प्रमाणात दारूच्या बाटल्यांचा (liquor bottles) खच आढळून आला आहे. मंत्रालयात राजपात्रित अधिकाऱ्यांच्या उपहारगृहाच्या खालील बाजूस हे एक रुम आहे. तिथे हे धक्कादायक (shocking) चित्र आढळून आले.

मंत्रालयातील उपहारगृह शेजारी दारूच्या बाटल्यांचा खच दिसून आला. साम टीव्हीने यासंदर्भात बातमी दाखवल्यानंतर लगेचच स्वच्छता कर्मचाऱ्यांनी तिथे पोचून दारूचा खच उचलायला सुरुवात केली.

मंत्रालयात राज्याच्या कानाकोपऱ्यातून लोक आपले प्रश्न घेऊन येतात. मंत्रालयात सहज प्रवेश मिळत नाही. तिथे खूप काटेकोर तपासणी केली जाते. त्यानंतरच आत प्रवेश दिला जातो. अगदी साधी सुई सुद्धा तपासणीशिवाय आत नेता येत नाही. मग मंत्रालयाच्या उपहारगृहाच्या परिसरामध्ये दारुच्या बाटल्या कशा पोहोचल्या? असा प्रश्न विचारला जातोय. दोन दिवसांपूर्वी गटारी अमावस्या सुद्धा होती. या प्रकरणाची पुढे चौकशी होणार किंवा कसे? ते अद्याप स्पष्ट झालेले नाही.