महाराष्ट्र नवनिर्माण सेनेचे (MNS) अध्यक्ष राज ठाकरे (Raj Thackeray) यांच्यावर हिप बोनची यशस्वी शस्त्रक्रिया करण्यात आली. मुंबईतील लीलावती रुग्णालयात ही शस्त्रक्रिया करण्यात आली. यानंतर अनेक दिग्गजांनी राज ठाकरे यांची भेट घेत त्यांच्या तब्यतेची विचारपूस केली आहे. दरम्यान, आज राज ठाकरे यांच्या तब्बेतीची विचारपूस करण्यासाठी जेष्ठ पार्श्वगायिका श्रीमती आशाताई भोसले यांनी शिवतीर्थ निवासस्थानी भेट दिली आहे. मनसेच्या एका कार्यकर्त्याने फेसबुकवरून ही माहिती दिली आहे. (singer asha bhosle meets raj thackeray)

राज ठाकरे यांच्या पायाचे दुखणे अधिक वाढल्याने ही शस्त्रक्रिया करण्यात आली असल्याची माहिती डॉक्टरांनी दिली होती. या शस्त्रक्रियेनंतर त्यांना दोन महिन्यांची सक्तीची विश्रांती घ्यावी लागणार आहे. शस्त्रक्रिया करण्यापूर्वीच्या चाचण्या करण्यासाठी राज ठाकरे लीलावती रुग्णालयात दाखल झाले होते.

याआधीही राज ठाकरे शस्त्रक्रियेसाठी जूनच्या पहिल्या आठवड्यात रुग्णालयात दाखल झाले होते. मात्र, तेव्हा त्यांच्या शरीरात कोरोनाचे डेड सेल्स आढळून आले होते. यामुळे त्यांना ॲनेस्थेशिया म्हणजे भुलीचे इंजेक्शन देता येऊ शकत नव्हते. त्यामुळे त्यांच्यावरील शस्त्रक्रिया पुढे ढकलण्यात आली होती, मनसेच्या अधिकृत ट्विटर हॅंडलवरून ही माहिती देण्यात आली होती.

दरम्यान, या शस्त्रक्रियेनंतर राज ठाकरे यांची प्रकृती स्थिर असल्याचे डॉक्टरांनी सांगितले आहे. दरम्यान, सुमारे दोन ते तीन महिने राज ठाकरे यांना कुठलाही दौरा करता येणार नाही. या काही दिवसांत त्यांची विचारपूस करण्यासाठी राजकीय मंडळींनीही भेट घेतली आहे. मागील काही दिवसांपूर्वी उपमुख्यमंत्री देवेंद्र फडणवीस यांनीही राज ठाकरेंची शिवतीर्थावर जाऊन भेट घेतील होती.