सोलापूर : सर्वसामान्य प्रवाशांना धार्मिक स्थळांना भेटी देता याव्यात, यासाठी आता खाजगी टूर्स अँड ट्रॅव्हल्स कंपन्यांना एसटीसोबत संयुक्तपणे सहली आयोजित करता येणार आहेत. जेणेकरून सामान्यांना कमी खर्चात निवास आणि भोजन व्यवस्थेसह धार्मिक पर्यटनाचा आनंद लुटता येणार आहे.

महाराष्ट्र राज्य परिवहन महामंडळाच्या या योजनेत राज्यातील सर्व टूर्स अँड ट्रॅव्हल्स कंपन्या सहभागी होतील, असा विश्वास परिवहन मंत्री प्रताप सरनाईक यांनी व्यक्त केला आहे. या अनुषंगाने एसटी महामंडळाच्या मुख्यालयात नुकतीच बैठक पार पडली. महामंडळाचे उपाध्यक्ष व व्यवस्थापकीय संचालक डॉ. माधव कुसेकर यांच्यासह खाजगी टूर्स अँड ट्रॅव्हल्स संस्थांचे प्रतिनिधी उपस्थित होते. राज्यातील गोर-गरीब जनतेला धार्मिक पर्यटनाचा आनंद लुटता यावा, हा या योजनेचा मुख्य हेतू असणार आहे. परिवहन महामंडळाच्या मदतीने खाजगी टूर्स अँड ट्रॅव्हल्स कंपन्यांनी कमी गर्दीच्या दिवसात सहलीचे आयोजन करावे. यासाठी पंढरपूरच्या धर्तीवर तीर्थक्षेत्राच्या ठिकाणी भाविक पर्यटकांना स्वच्छतागृह व निवास व्यवस्था (जिथे उपलब्ध असेल तिथे) निःशुल्क उपलब्ध करून देण्यात येणार आहे.

श्रावण महिन्यापासून योजनेची सुरवात

कमी गर्दीच्या हंगामामध्ये विशेषतः सुट्ट्यांच्या दिवशी एसटीला प्रवासी भारमान कमी असते. त्यामुळे उत्पन्न कमी मिळते. अशावेळी एसटीने खाजगी टूर्स अँड ट्रॅव्हल्सच्या माध्यमातून सर्वसामान्य जनतेसाठी धार्मिक पर्यटनस्थळी सहली आयोजित केल्यास त्यातून एसटी महामंडळाचे उत्पन्न वाढेल, तसेच सर्वसामान्य प्रवाशांना किफायतशीर दरात पर्यटनाचा आनंद लुटता येईल, असा या योजनेचा उद्देश आहे. त्या अनुषंगाने खाजगी टूर्स आणि ट्रॅव्हल्स कंपन्यांनी एसटी महामंडळाच्या संयुक्त विद्यमाने कमी गर्दीच्या दिवशी पर्यटकांच्या मागणीनुसार अष्टविनायक दर्शन, तुळजापूर- पंढरपूर- अक्कलकोट दर्शन, ज्योतिर्लिंग दर्शन, त्रंबकेश्वर- नाशिक दर्शन अशा धार्मिक सहलींचे आयोजन करण्यात येणार आहे. या उपक्रमाची सुरुवात येत्या श्रावण महिन्यापासून करण्यात येणार आहे.