राज्यभरात आज एसटी कर्मचारी (ST Employees) आपल्या मागण्या घेऊन आंदोलन करत आहेत. न्यायालयाने कामावर हजर होण्याचे निर्देश दिल्यानंतर देखील एसटी कर्मचाऱ्यांनी हे आंदोलन मागे न घेण्याची भूमिका घेतली आहे. जो पर्यंत एसटी महामंडळाचा (MSRTC) राज्य शासनात समावेश होत नाही, तो पर्यंत हे आंदोलन मागे घेणार नाही या मागणीवर ते ठाम आहेत. एसटी महामंडळ देखील आता कामगारांविरोधात न्यायालयात जाणार आहेत. इंडस्ट्रीयल कोर्ट आणि हायकोर्टाने कोर्टाच्या हे आंदोलन चुकीचं असल्याचं म्हणत आदेशाचा अवमान केल्या प्रकरणी आंदोलन करणाऱ्या कर्मचाऱ्यांविरोधात अवमान याचिका दाखल करण्यास सांगितले होते.

एसटी महामंडळाच्या कर्मचाऱ्यांनी आज राज्य भरातील सर्व डेपोमधील गाड्या थांबवल्या असून, आपल्या मागण्या मान्य होई पर्यंत कोणतीच बस हालणार नाही, अशी ठाम भूमिका घेतली आहे. त्यानंतर आता एसटी महामंडळ उद्या सकाळी 10 वाजता अवमान याचिका दाखल करणार आहे. महामंडळाने देखील आता कर्मचाऱ्यांविरोधात कठोर भूमीका घेतली असून एस.टी. कर्मचाऱ्यांच्या संपाविरोधात अवमान याचिका दाखल करणार आहे. तांत्रिक कारणांमुळे आज कागदोपत्री प्रक्रीया पूर्ण होऊ न शकल्यानं उद्या ही याचिका दाखल करण्यात येणार आहे.

दरम्यान, उद्या हायकोर्टात होणार पुन्हा सुनावणी होणार आहे. त्यापूर्वी काल सरकारने एसटी कर्मचाऱ्यांच्या संपामुळे प्रवाशांची होणारी गैरसोय टाळण्यासाठी खासगी वाहनांना प्रवासी वाहतुकीसाठी परवानगी देण्याचा दिली आहे.