सध्या राज्यात एसटी महामंडळाच्या कर्मचाऱ्यांचा संप सुरू आहे. त्यामुळे अनेक आगारातून एसटी वाहतूक विस्कळीत झाली आहे. याचबरोबर ऐन गणेशोत्सवाच्या तोंडावर कर्मचाऱ्यांनी काम बंद आंदोलन सुरू केल्याने गणेशोत्सवासाठी गावी जाणाऱ्या चाकरमान्यांची मोठी कोंडी झाली आहे.

गणेशोत्सवापूर्वी हजारो चाकरमान्यांनी गावी जाण्यासाठी ई-तिकिटाच्या माध्यमातून सीट आरक्षित केले होते. पण आता संपामुळे प्रवास न करता आल्यास आरक्षित केलेल्या तिकिटाचे पैसे पत मिळणार की नाही असा प्रश्न हजारो प्रवाशांना पडला आहे.

ई-तिकीट रद्द केल्यास पैसे परत मिळतात का?

ई-सकाळने एसटीचे ई-तिकीट रद्द केल्यास पैसे परत मिळतात का याविषयी एसटीच्या अधिकृत संकेतस्थळावर चौकशी केली. एसटीच्या संकेतस्थळावर सांगण्यात आले की, ई-तिकीट परवानगी असलेल्या कालावधीत रद्द केल्यास, मूळ भाड्याचा 100% परतावा मिळू शकतो. पण सरकारी सेवा कर शुल्कासह आरक्षण शुल्क आणि सुविधा शुल्क मात्र परत मिळू शकत नाही.

पैसे परत मिळवण्याचे नियम

गाडी सुटण्याच्या 24 तास आधी तिकिट रद्द केल्यास 10%, 12 तास आधी रद्द केल्यास 25% आणि नियोजित प्रस्थान वेळेच्या 4 तासांच्या आत रद्द केल्यास 50% शुल्कच परत मिळू शकते.

बँक खात्यातच येणार पैसे

तिकीट रद्द केल्यास भाड्याचा परतावा संबंधित बँक खात्यातूनच केला जाईल. प्रवाशांना कोणताही रोख परतावा मिळणार नाही.

कसे रद्द करायचे ई तिकीट?

ई-तिकीट रद्द करण्यासाठी महाराष्ट्र राज्य एसटी महामंडळाच्या अधिकृत संकेतस्थळावर जाऊन ई-तिकीट सेक्शनमध्ये संबंधि माहिती भरल्यानंतर तुम्हाला ई-तिकीट रद्द करता येईल.