मुंबई : राज्यात सत्तांतर झाल्यानंतर शिंदे-फडणवीस सरकारचा पहिला अर्थसंकल्प नऊ मार्चला विधिमंडळात सादर होणार आहे. विधीमंडळाच्या कामकाज सल्लागार समितीच्या आज झालेल्या बैठकीत यंदाचे अर्थसंकल्पी अधिवेशन २७ फेब्रुवारी ते २४ मार्च दरम्यान घेण्याचा निर्णय झाला. यामधे, मराठवाडा मुक्ती संग्रामाच्या अमृतमहोत्सवी वर्षाचा ठराव एकत्रितपणे मांडण्याची विरोधी पक्षनेते अजित पवार यांची सूचनाही मान्य करण्यात आली.

राज्यसरकारने नुकतेच राज्यगीत म्हणून स्वीकारलेले ‘जय जय महाराष्ट्र माझा’ हे गीत अधिवेशनाच्या पहिल्या दिवशी दोन्ही सभागृहांत पूर्ण सन्मानाने आणि शिष्टाचारात वाजविले जाणार आहे. आजच्या बैठकीत विधानपरिषद व विधानसभा बैठकांच्या तात्पुरत्या दिनदर्शिकेवर चर्चा करण्यात आली.

अधिवेशनाची सुरुवात २७ फेब्रुवारी रोजी राज्यपालांच्या अभिभाषणाने होणार आहे. आजच्या बैठकीला विधानपरिषदेच्या उपसभापती डॉ.नीलम गोऱ्हे, विधानसभेचे अध्यक्ष राहुल नार्वेकर, मुख्यमंत्री एकनाथ शिंदे, उपमुख्यमंत्री देवेंद्र फडणवीस, विरोधी पक्षनेते अजित पवार, विधानपरिषद विरोधी पक्षनेते अंबादास दानवे यांच्यासह समितीचे सदस्य मंत्री आणि अधिकारी उपस्थित होते.

मराठवाडा मुक्ती संग्राम दिनाच्या अमृत महोत्सवी वर्षानिमित्त अभिवादनाबाबतचा ठराव दोन्ही सभागृहांत मांडण्यात येणार आहे. तसेच जागतिक महिला दिनानिमित्त ८ मार्च रोजी दोन्ही सभागृहांत याबाबत विशेष चर्चा होईल.

अर्थसंकल्पावर तीन दिवस, तर अर्थसंकल्पी मागण्यांवर सहा दिवस चर्चा करण्यात येणार आहे. विधेयकांपैकी प्रस्तावित विधेयके (मंत्रिमंडळाची मान्यताप्राप्त) पाच आणि प्रस्तावित विधेयके (मंत्रिमंडळाची मान्यता अपेक्षित) आठ अशी अंदाजे १३ विधयके या अधिवेशनात मंजुरीसाठी मांडली जाणार आहेत.

फडणवीस मांडणार पहिलाच अर्थसंकल्प

उपमुख्यमंत्री देवेंद्र फडणवीस हे अर्थमंत्री म्हणून यंदा पहिलाच अर्थसंकल्प मांडणार आहेत. आजपर्यंतच्या विधिमंडळ कारकिर्दीत फडणवीस यांची अर्थसंकल्पावरील भाषणे गाजली आहे. अर्थसंकल्पाचे अभ्यासक आमदार म्हणून त्यांची ख्याती आहे.

‘अर्थसंकल्प सोप्या भाषेत’ हे पुस्तकही त्यांनी लिहिले आहे. त्यातच यंदाच्या अर्थसंकल्पासाठी जनतेकडून सूचना आणि शिफारशी त्यांनी मागविल्या असून, जनतेच्या मनातील अर्थसंकल्प सादर करण्याचा त्यांचा संकल्प कसा असेल, याची उत्सुकता आहे.