मुंबई - टर्मिनल 1 आणि 2 वरील प्रवेश मार्ग प्रकल्पाचे उद्घाटन समारंभाचे आयोजन एमएमआरडीएनं केलं होतं. हा प्रकल्प 18 महिन्यात पूर्ण होईल अशी अपेक्षा व्यक्त केली जात आहे. या प्रकल्पामुळे मुंबईकरांची वाहतूक कोंडीतून सुटका होणार आहे. मुंबईच्या पायाभूत सुविधांच्या विकासाचा प्रयत्न करण्यात येत आहे. या कार्यक्रमासाठी मुख्यमंत्री उद्धव ठाकरे, उपमुख्यमंत्री अजित पवार, केंद्रीय मंत्री रामदास आठवले यांच्यासह नेते उपस्थित होते. या कार्यक्रमात बोलताना अजित पवार यांनी मोदींनी राज्यासोबत दुजाभाव केल्याची तक्रार केंद्रीय मंत्री रामदास आठवलेंकडे केली. तौक्ते वादळानंतर गुरजातला मदतीची घोषणा केली मात्र महाराष्ट्रासाठी अद्याप काहीच दिलेलं नाही. केंद्राची वाट न बघता राज्यातील नागरिकांना मदत केली असंही अजित पवार म्हणाले.

अरबी समुद्रात आलेल्या तौक्ते वादळाने किनारपट्टीवरील भागात प्रचंड हानी झाली. वादळानंतर याचा फटका बसलेल्या गुजरातमधील भागाची पंतप्रधान मोदींनी हवाई पाहणी केली होती. त्यानंतर मोदींनी गुजरातला एक हजार कोटी रुपयांची मदतही जाहीर केली. मात्र महाराष्ट्राला अद्याप मदत देण्यात आलेली नाही. याबद्दल बोलताना अजित पवार म्हणाले की, मोदींनी गुजरातला एक हजार कोटी रुपये दिले पण महाराष्ट्राला अजुनही मदत मिळालेली नाही. महाराष्ट्राला जेवढं वाटतं तेवढं तरी द्या. वादळग्रस्तांना मदतीसाठी मोदींना आठवण करून द्या अशी विनंतीही अजित पवार यांनी रामदास आठवले यांच्याकडे केली.

कोरोनाच्या संकटाने सगळं काही थांबलं आहे. कामं ठप्प झाली आहेत. अशाही परिस्थितीत राज्यातील जनतेला उत्तम सुविधा देण्याचा प्रयत्न आहे. विकासाला खीळ बसू देणार नाही असंही अजित पवार यांनी म्हटलं.

पेट्रोलच्या किंमती वाढत चालल्या आहेत. त्यात हस्तक्षेप केंद्राने केला पाहिजे. राज्य सरकारही कर लावतं पण केंद्राकडून कर लावतं. केंद्राचा कर जास्त असतो, केंद्राने कर कमी करण्याचा प्रयत्न करावा. अनेक ठिकाणी पेट्रोल 100 रुपये लिटरच्या वर गेलं असल्याचं अजित पवार यांनी सांगितलं.