पुणे - निष्ठेने सेवा करणाऱ्या आणि शैक्षणिक क्षेत्रात उत्कृष्ट काम करणाऱ्या राज्यातील १०८ शिक्षकांना क्रांतिज्योती सावित्रीमाई फुले राज्य शिक्षक गुणगौरव पुरस्कार’ जाहीर झाले आहेत. शालेय शिक्षण विभागाने २०२२-२३ या वर्षातील राज्य शिक्षक पुरस्कारांची घोषणा शुक्रवारी करण्यात आली. या पुरस्कारांचे वितरण मुख्यमंत्री एकनाथ शिंदे यांच्या प्रमुख उपस्थितीत येत्या मंगळवारी (ता.५) मुंबईत होणार आहे.

या पुरस्कारासाठी शिक्षकांची अंतिम निवड करण्यासाठी २५ ऑगस्ट रोजी राज्य निवड समितीची ऑनलाइन बैठक झाली. या बैठकीतील शिफारशीनुसार राज्य सरकारने पुरस्काराची घोषणा केली आहे. या पुरस्कारांचे वितरण शिक्षक दिनाचे औचित्य साधून होणार आहे. यावेळी मुख्यमंत्र्यांसह उपमुख्यमंत्री देवेंद्र फडणवीस, उपमुख्यमंत्री अजित पवार, शालेय शिक्षण मंत्री दीपक केसरकर आदी मान्यवरांच्या उपस्थितीत राहणार आहेत.

प्रवर्गनिहाय पुरस्कारांची संख्या :

प्रवर्ग : पुरस्कारांची संख्या

• प्राथमिक : ३७

• माध्यमिक : ३९

• आदिवासी क्षेत्रात उत्कृष्ट काम करणारे शिक्षक (प्राथमिक) : १९

• थोर समाजसुधारक क्रांतिज्योती सावित्रीमाई फुले आदर्श शिक्षिका पुरस्कार : ८

• विशेष शिक्षक कला/क्रीडा : २

• दिव्यांग शिक्षक/दिव्यांग विद्यार्थ्यांच्या शाळेतील शिक्षक : १

• स्काऊट/गाइड : २

पुरस्कारर्थींच्या यादीत असणाऱ्या पुणे जिल्ह्यातील शिक्षकांची नावे :

- माधुरी शेजवळ, सहाय्यक शिक्षक, जिल्हा परिषद प्राथमिक शाळा तळेगाव ढमढेरे नंबर १

- वैभव पोरे, सहाय्यक शिक्षक, जिल्हा परिषद प्राथमिक शाळा होळकरवाडी

- संपत गर्जे, सहाय्यक शिक्षक, भारतीय जैन संघटनेचे माध्यमिक व उच्च माध्यमिक विद्यालय, पिंपरी

- हर्षा पिसाळ, सहाय्यक शिक्षक, लक्ष्मणराव आपटे प्रशाला, पुणे

- संतोष थोरात, सहाय्यक शिक्षक, जिल्हा परिषद प्राथमिक शाळा निगडाळे केंद्र राजपूर बीट तळेघर, (ता.आंबेगाव)