सोलापूर : मोबाईल क्रमांक व ई-मेलची नोंदणी केलेल्या वीजग्राहकांना ‘महावितरण’कडून दरमहा वीजबिल पाठविण्यात येते. पुणे प्रादेशिक विभागाअंतर्गत ‘महावितरण’कडे घरगुती, वाणिज्यिक, औद्योगिक, कृषी व इतर ८२ लाख ४८ हजार ३४७ ग्राहकांकडून मोबाईल क्रमांक आणि १४ लाख ९५ हजार ५६२ ग्राहकांकडून ई-मेलची नोंदणी करण्यात आली आहे. विशेष म्हणजे एकाच ग्राहकाला मोबाईल क्रमांक व ई-मेलची नोंदणी करून दोन्हीकडून दरमहा वीजबिल मिळविता येईल.

‘महावितरण’ने बिलींगची प्रक्रिया केंद्रीय स्तरावरून सुरू केली आहे. त्यासाठी मोबाईल ॲपद्वारे प्रत्येक महिन्याच्या १ ते २५ तारखेतील एका निश्चित तारखेला लघुदाब वीज ग्राहकांकडील मीटरचे फोटो रीडिंग घेतले जाते. त्यानंतर केवळ एक ते दोन दिवसात वीजबिल तयार करून ते मोबाईल किंवा ई-मेलद्वारे ग्राहकाला पाठविले जाते. त्यासाठी केवळ मोबाईल क्रमांक व ई-मेल आयडीची ‘महावितरण’कडे नोंदणी जरुरी आहे.

वीजबिलाच्या तारखेपासून ७ कार्यालयीन दिवसात भरणा (प्रॉम्ट पेमेंट) केल्यास एक टक्का सवलत मिळते. त्याची तारीख वीजबिलात नमूद असते. ‘एसएमएस’ किंवा ई-मेलद्वारे वीजबिल घेतल्यास ही सूट मिळविणे अधिक सोयीचे आहे. मोबाईल क्रमांक नोंदणी केल्यास पूर्वनियोजित देखभाल-दुरुस्ती, खंडित वीजपुरवठ्याची माहिती, रीडिंग घेतल्याची तारीख व युनिटची संख्या, वीजबिलाची रक्कम, देय दिनांक, वीजपुरवठा खंडित करण्याची नोटीस याची माहिती नोंदणीकृत मोबाईलवर येते. त्यामुळे सर्वांनी मोबाईल क्रमांक व ‘ई-मेल’ची नोंदणी करावी, असे आवाहन पुणे प्रादेशिक संचालक अंकुश नाळे यांनी केले आहे. सोलापूर जिल्ह्यातील १० लाख ५१ हजार ८७४ ग्राहकांनी मोबाईल क्रमांक आणि त्यातील ९२ हजार ३७६ ग्राहकांनी ई-मेलची नोंदणी केली आहे.

अशी करा ई-मेल किंवा मोबाईल क्रमांकाची नोंदणी

• - ‘महावितरण’च्या www.mahadiscom.in या संकेतस्थळावरून किंवा महावितरण ॲपद्वारे मोबाईल क्रमांक व ई-मेलची नोंदणी करण्याची सोय

• - वीजग्राहकांनी नोंदणी करावयाच्या मोबाईल क्रमांकावरून MREG (स्पेस) (बारा अंकी ग्राहक क्रमांक) अशी माहिती टाइप करून ९९३०३९९३०३ क्रमांकावर ‘एसएमएस’ केल्यास मोबाईल क्रमांकाची नोंदणी होते.

• - याशिवाय २४ तास सुरू असणाऱ्या कॉल सेंटरच्या टोल फ्री १९१२ किंवा १८००२१२३४३५ किंवा १८००२३३३४३५ क्रमांकावर संपर्क साधून नोंदणी करता येते.