मुंबई - राज्यपाल भगतसिंह कोश्यारी आणि भाजपचे राष्ट्रीय प्रवक्ते सुधांशू त्रिवेदी यांनी शिवाजी महाराजांविषयी वादग्रस्त विधान केल्यामुळे राज्यभरातून भाजपवर टीकेची झोड उठली आहे. यातच माजी आमदार हर्षवर्धन जाधव यांनी देखील भाजपवर निशाणा साधला आहे. हर्षवर्धन जाधवांनी थेट चहा टपरीवरुनच भाजपला खडे बोल सुनावले आहे. (Sudhanshu Trivedi's controversial statement news in Marathi)

हर्षवर्धन जाधव म्हणाले की, काही महाभाग म्हणतात की, हर्षवर्धन जाधव १० वर्षे आमदार राहिले, तरी शिव्या देतात. अरे छत्रपती संभाजी महाराजांनी एकदा माफी मागितली असती तर त्यांचा जीव वाचला असता. संभाजी महाराजांचे प्रेररणास्त्रोत असलेल्या शिवाजी महाराजांनी पाच वेळा माफी मागितल्याचं भाजपवाले म्हणतात. मग शिव्या नाही घालणार तर ओव्या करणार का? असा संतप्त सवाल त्यांनी उपस्थित केला.

हेही वाचा: मुदत ठेवीच्या मुद्दलातून टीडीएस कपात? इथे करा तक्रार....

सभ्यता मला शिकवता. भाजपची सभ्यता कुठ गेली? औरंगजेब कधी म्हणाला नाही शिवाजी महाराजांनी माफी मागितली नाही. भाजपवाले औरंगजेबाच्या पुढं गेले. ते म्हणतात माझ्यामुळे जलील निवडून आला. अरे जलील अशा गोष्टी करत नाही ते भाजपवाले करतात असही हर्षवर्धन जाधव म्हणाले.

याआधी उद्धव ठाकरे यांनी देखील भाजपवर कडाडून टीका केली होती. शिवाजी महाराज आमची अस्मिता आहे. मात्र आमच्या अस्मितेवर सातत्याने हल्ला होत आहे. यामागे कोणाचा मेंदू आहे असा प्रश्न उद्धव ठाकरे यांनी उपस्थित केला होता.