Pankaja Munde News : भाजपच्या महिला नेत्या पंकजा मुंडे यांनी केलेल्या विधानावरून चांगलेच वातावरण तापलेले असताना, भाजप नेते सुधीर मुंनगंटीवर यांनी प्रतिक्रिया दिली आहे. मुंडेंच्या विधानानंतर भाजपच्या गोटात नाराजीचे वातावर आहे. त्यात आता मुंनगंटीवारांनी प्रतिक्रिया देत पंकजा मुंडेंची पाठराखण केली आहे. त्यामुळे हा वाद लवकरच शांत होईल असे चित्र दिसू लागले आहे. जनमानसात माझी प्रतिमा चांगली असेल तर मोदीही माझं राजकारण संपवू शकणार नाहीत, असं पंकजा मुंडेंनी विधान केले होते.

पाठराखण करताना मुंनगंटीवार म्हणाले...

अनेकदा असे होते की, पात्रता नसताना मुख्यमंत्र्यांचा मुलगा म्हणून एका पदावर जातो. एखाद्या राष्ट्रीय अध्यक्षाचा मुलगा म्हणून पात्र नसतानाही त्या पदावर जाण्याचा प्रयत्न करतो. नेमका हाच भाव पंकजा मुंडेंचा असावा असे मला वाटते. मात्र, यासंबंधीचे अधिक स्पष्टीकरण पंकजा मुंडे यांच्याकडूनच घेतले पाहिजे असे मुनगंटीवार म्हणाले. मोदी मला संपवू शकत नाहीत असा पंकजा मुंडेंच्या म्हणण्याचा अर्थ नव्हताच असे सर्वप्रथम मुनगंटीवार यांनी स्पष्ट केले. मोदींनी वंशवाद संपवण्याचा निर्णय घेतला आहे, पण मी जर जनतेच्या ह्रदयाचं प्रतिक असेन तर निश्चितच या वंशवादात बसणार नाही अशी प्रतिक्रिया देत मुनगंटीवार यांनी पंकजा मुंडेंची पाठराखण केली आहे.

काय म्हणाले एकनाथ खडसे

तर, दुसरीकडे राष्ट्रवादी काँग्रेस नेते एकनाथ खडसे यांनीदेखील पंकजा मुंडेंची बाजू घेत प्रतिक्रिया दिली आहे. ‘अनेक वर्ष मी प्रामाणिकपणे काम केलं असेल तर मला कुणीही पराभूत करू शकणार नाही, अशी त्यांची भावना असेल. कदाचित मोदींचं नाव त्यांनी कोणत्या अर्थाने घेतलं, हे मला सांगता येणार नाही. पण, मोदींना आव्हान दिलं असेल तर ते दुर्दैवी आहे. मोदींना आव्हान दिलं नसेल. त्याचा अर्थ तसा घेतलाही जाऊ नये, अशी प्रतिक्रिया भाजपचे माजी नेते आणि आता राष्ट्रवादीत असलेले एकनाथ खडसे यांनी दिली आहे.